Дяве. И гафуни хамуниз цак акъудзава, рикIик гъалаба, къурхулувал кутазва. Ленинграддин гьалкъадин мусибатдин вакъиайрин шагьид хьайи Жанна Александровнади дяведин йисара эхай каш-мекь, акур кьван ягъунар-кьиникьар, етим хьайи аялар вилерал накъвар алаз рикIел хкизва. Ам алай вахтунда СтIал Сулейманан райондин Вини СтIалрин хуьре яшамиш жезва. Кьисметди ам са шумуд цIуд йис идалай вилик Кьиблепатан Дагъустанда авай и хуьруьз акъудна.
Жанна Александровна 1938-йисан 1-апрелдиз Ленинградда кесиб хизанда дидедиз хьана. Лап гъвечIи чIавалай адаз гзаф четинвилер акуна. Диде-бубадикай магьрум хьайи ам етим аялрин кIвализ акъатна. Шегьер фашистри гьалкъада тунвай, югъди-йифди ам тупарай язавай. Шегьердихъ галаз алакъа хуьзвай авайни — авачир гуьтIуь рехъ Ладождин вир тир. Ам а четин йисара рикIив кIвалахиз тазвай тек са дамуниз ухшар авай. Ленинградда гьалар къизгъинбур хьуниз килигна, а чIавуз гзаф аялар Ярославлдин областдиз акъуднай. Абурун арада чи Жаннани авай.
Рыбинск шегьерда училище акьалтIарай руша Алма-Атада са заводда зегьмет чIугваз гатIунна. А чIавуз гьа карханада винистIалви Бунямед Мегьамедовани кIвалахзавай. Абур сад-садал ашукь хьана, хизан кутуна. 1961-йисуз Жанна Александровна вичин уьмуьрдин юлдашдихъ галаз Дагъустандиз, адан хайи хуьруьз хтана. Гуьгъуьнлай Мегьамедоври «Калининский» совхозда зегьмет чIугуна…
Бунямед ва Жанна Мегьамедоврин хизанда пуд велед чIехи хьана. Къе бадедин гуьгьуьлар ругуд хтулдини ирид птулди шадарзава. «Зун зи кьисметдилай рази я. Захъ, туькIвей, бахтлу хизан ава. Мад вуч кIанда кьван инсандиз?!», — лугьузва рикIел дяведин дар йисарин гелер аламай и викIегь дишегьлиди. Къуй виридахъ Жанна Александровнадихъ хьтин бахтлу хизанар хьурай!
Замир Мегьамедов,
Вини СтIал
