ЦIийи ктабар
Гьа ихьтин тIвар алаз Махачкъаладин «Мавел» чапханада 500 экземплярдин тираж аваз цIийи ктаб чапдай акъатнава. 15-январдиз Ахцегь райондин кьилин ктабханадин кIелдайбурун залда адахъ галаз танишарунин мярекат кьиле фена. Ана гьатнавай шиирар урус чIалаз элкъуьрнавайди шаир-таржумачи, литературадин критик Максим Алимов я.
Ктаб лезгийрин милли медениятдин федеральный дережадин автономияди «Руьгьдинни тарихдин ирсинин ивирар – Россиядин халкьдин бине» программа кьилиз акъудунин сергьятра аваз чапдай акъуднава. КIелзавайбурун вилик чпихъ кьилдин хатI авай, амма алай вахтунин кIелчийрин гегьенш къатариз артух таниш тушир бажарагълу лезги шаиррин кIватIал гъанва. Адан кьилин метлеб шииратдал рикI алайбурув жуьреба-жуьре себебралди чпин яратмишунар чапдиз тIимил акъуднавай, я эсиллагь акъудиз тахьанвай, чеб вини дережадин чIалан устадар тир шаиррин эсерар агакьарун я. КIватIалда шаирар тир Максим Алимова, Минаят Муталибовади, Сейфудин Шагьпазова, Шагьмардан Агъакишиева, Халидин Эльдарова, Мегьамед Ибрагьимова, Сулейман Сулейманова лайихлу чка кьунва.
«Лезги газетдин» эдебиятдинни медениятдин отделдин редактор, Дагъустандин писателрин Союздин секретарь, лезги эдебиятдин секциядин регьбер Максим Алимова къейд авурвал, лезги шаиррин кIватIал чапдай акъатун халкьдин медениятдин уьмуьрда важиблу вакъиа хьиз кьабулиз жеда. Ада ктабда гьатнавай шаиррикай, абурун эсеррин кьетIенвилерикай вичин фикирар лагьана.
М.Алимован рахунрай малум хьайивал, алай йисуз Дагъустандин писателрин Союздин 90 йис тамам жезва. Идалайни гъейри, РД-дин кьил Сергей Меликован тапшуругъдалди СтIал Сулейманан 155 йисан юбилейни вини дережада аваз къейдда. М.Алимова «ЦIийи дуьнья» газетдин къвалав гвай эдебиятдин «Самурдин сес» тешкилатдин кIвалахдал чан хкун чарасуз тирдал кIватI хьанвайбурун фикир желбна.
М.Нариманов
