23-январдиз РД-дин Гьукуматдин Председатель Абдулмуслим Абдулмуслимова «Газпром межрегионгаз Махачкъала» карханадин ва газдин маса къуллугърин векилрихъ галаз совещание кьиле тухвана. Анал республикадин премьер-министрди дагъустанвийрин кIвалера авай газдин алатрин технический гьалдал гуьзчивал тухузвай гьукумдин жавабдар органрин ва карханайрин кIвалахдилай вичин наразивал къалурна.
«КIвалера авай газдин алатрин жигьетдай технический рекьяй ахтармишунар кьиле тухудай вахтуниз талукь малуматар газдин къуллугърин сайтра хьун герек я. Адресриз, муьгьлетриз талукь делиларни галаз. Къенин юкъуз сайтра ихьтин малуматар авани? Чаз малум тирвал, 2024-йис патал ихьтин малуматар гьазур туш. Дагъустанвийриз и жигьетдай кьиле тухузвай кIвалахдикай, кьабулзавай серенжемрикай са хабарни авач», — лагьана А.Абдулмуслимова.
И кардихъ галаз алакъалу яз, РД-дин Гьукуматдин Председателди талукь идарайриз и кIвалах къайдадик кутун ва агьалийриз, газдин алатрикай менфят къачудайла, хатасузвилин къайдайрал амал авуниз эвер гузвай малуматар раиж авун буйругъна. Агъадихъ чна мад сеферда а къайдаяр рикIел хкизва.
- Агьалийри чпин газдин приборди, пичинин гурмагъри ва гьава дегишардай алатри кIвалахзавай тегьер гуьзчивилик кутун, гум акъатзавай рекьер вахт-вахтунда михьун лазим я.
- Газдикай менфят къачузвай ксари акIажариз жедай (гибкий) шланг авай гьал ахтармишун лазим я. Ам вич вичел элкъвена ва я тахьайтIа, акъаж хьана виже къведач. ГьакIни шланг электрический алатрихъ галукьна кIандач.
- Дараматда газдин ни аваз хьайитIа, ана газдин алатар ишлемишдай ихтияр авач.
- Хуьрекардай кIвале гьава дегишарун патал кардик кутунвай махсус чка (вытяжка) азад хьана кIанда.
- Газдин пичини ва я колонкади кIвалахдай чIавуз дакIардин вил, я дакIар ачухун лазим я.
- Газдин алат кардик кутадайла ва я ремонтдайла, гъавурда авай пешекарриз (газдин карханадин къуллугъчийриз) эверна кIанда.
- Къайдадик квачир ва сертификат галачир газдин алатар ишлемишна виже къведач.
- Чпихъ и рекьяй махсус пешекарвал, тежриба авачир инсанриз кIвализ газ гъунихъ, газдин алатар ремонт авунихъ, абур дегишарунихъ галаз алакъалу кIвалахар кьиле тухудай ихтияр авач.
- Газдин турбаяр чеб чпихъ ва я маса алатрихъ галкIурнавай чкайрин жуфтвал (герметичность) ачух цIалди, месела, спичкадалди, зажигалкадалди, шеминалди ахтармишна кIандач.
- Газдин алатрив мектебдиз фин тийидай яшда авай аялар агудна кIандач.
- Газдин алатар бинедилай вуч паталди гьазурнавайди ятIа, гьа карда ишлемишна кIанда. Абурукай маса макьсадар аваз менфят къачуна виже къведач. Мисал яз, газдин пичинал пекер кьурурун дуьз туш ва я тахьайтIа, кIвал газ ачухдаказ кузвай цIалди чими авуна кIандач.
- Пичиник кутунвай шланг вич вичел элкъуьрна, адал илисна ва я ам чуькьвена виже къведач.
- Дараматда газдин ни аваз хьайитIа, сифте нубатда газдин кран агална, ахпа ракIарар, дакIарар ачухна кIанда. Электрический алатрик хкIуна виже къведач ва газдин къуллугъдиз (шегьердин телефонрай — 04, мобильный телефонрай — 104) зенг авун лазим я.
КIвале ва квартирада авай газдин алат къайдадикай хкатай дуьшуьшра, яргъал вегьин тавуна, газдин къуллугъдин векилдиз хабар гана кIанда.
Газ ишлемишзавай гьар са касди газдихъ галаз алакъалу кIвалахрал машгъул жезвай махсус тешкилатдихъ галаз икьрар кутIунна кIанда — технический ва ремонтдин жигьетдай кIвалахар гъавурда авай пешекарри кьиле тухудайвал.
«Газ для Дагестана» телеграм-каналда агьалийриз ганвай меслятрин арада ихьтин теклифарни ава:
Эгер куьн са йикъалай гзаф вахтунда кIвале жезвачтIа, газдин кранар агала.
Газдин алатар ишлемишдайла, кIвале шагьвар къекъуьра.
КIвалахзавай газдин пич гуьзчивал алачиз тамир.
Гьазурайди — Муса Агьмедов
