И йикъара милли эдебиятдал рикI алайбуруз фадлай таниш тир шаир Агъалар Аллагьвердиевич Исмаилов чи арадай акъатна. Адан 79 йис тир. Агъалар Исмаилов 1945-йисан 30-мартдиз Ахцегь райондин Мацарин хуьре дидедиз хьана. Юкьван мектеб акьалтIарай жегьилди сифте колхозда, гуьгъуьнлай Махачкъалада эцигунрин хиле кIвалахна.
Аллагьдин патай яратмишдай пай ганвай ада жегьил чIавалай шиирар кхьизвай. Лезги шииратдиз ам алатай асирдин кьвед лагьай паюна атана. Культпросветучилище акьалтIарай А.Исмаилован эсерар 1964-йисалай чапдиз акъатиз гатIунна. Жуьреба-жуьре йисара адан къелемдикай «Сифте муьгьуьббат», «Кимин къванер», «Йифиз кIватIай чиг», «Кьисметдин мензилар» ктабар хкатна. Шаирдин эсерар «Лезги газетда», «Самур» журналда чапзавай.
Бажарагълу шаир Агъалар Исмиалов Урусатдин писателрин Союздин член тир.
«Лезги газетдин» редакциядин коллективди, Агъалар Аллагьвердиевич Исмаилов рагьметдиз финихъ галаз алакъалу яз, адан хизанриз, вири мукьва-кьилийриз башсагълугъвал гузва.
