2024-йис патал «Лезги газетдин» 10 ва адалай гзаф экземплярар кхьиз, редакциядив пулдин такьатар агакьарай вири рухвайризни рушариз чна рикIин сидкьидай сагърай лугьузва. Хайи чIалал акъатзавай газетдин тираж артух хьуник куьне кутунвай пай екеди я. Къуй куь берекатрин сан мадни гзаф хьурай!
Агъадихъ чна абуруз бахшнавай тебрикдин бендер гузва. ТIварар алфавитдин къайда хвена кхьенва
Дагъустандилай къеце
Абасов Мамедаз – Красноярск шегьерда эцигунрин холдингдин векилдиз:
Лезги чилин кьегьал хва,
Гьар са карда кьилева.
Вич яргъара аватIани,
ЧIални Ватан рикIева.
Агъажан ва Рустам Адигуьзеловриз – Москвада яшамиш жезвай къурушви карчийриз:
МашаАллагь и стхайриз –
Жумартвал хас дагъвийриз.
Гьар са йисуз датIана
Газет кхьизва лезгийриз.
Балакишиев Заураз – Краснодарда яшамиш жезвай вурварви карчидиз:
Вурварвиди гьар йисуз
Вичин пайни кутазва.
Лезги халкьдин кар алай
Мярекатра аквазва.
Гьажиев Фазилаз – Москвада яшамиш жезвай къурушви карчидиз, «ЛЕКИ» фондунин, ФЛНКА-дин векилдиз:
Хайи чIалан къадир авай
Къурушви я, Фазил я.
Кар алакьдай тешкилатчи,
Къилихдизни къизил я.
Гьасанов Васифаз – ФЛНКА-дин президентдиз:
Хайи Ватан, чIал патал
РикI кузвай са кьегьал я.
Гьар са карда куьмек гун
Адаз хас тир амал я.
Гьасанов Садикьаз – Ярославлда яшамиш жезвай къурушви хциз:
Гьуьрмет авай мирес я,
Чидач адаз кагьулвал.
Адахъ галаз рахайла,
Михьиз квахьда сугъулвал.
Керимов Арифаз – ФЛНКА-дин Советдин председателдиз:
Урусатдин меркезда
Куьн чи халкьдин дестек я.
Эхь, куьн хьтин рухваяр
Ватандиз лап герек я.
Керимов Токайаз – «Национальное возрождение» фондунин президентдиз:
Токай стха якъиндиз
Амадаг я газетдин.
«Ваъ» лугьур гаф чидай туш
Сагьибдиз чи гьуьрметдин.
Магьсубов Алимегьамедаз – Нижний Новгородда яшамиш жезвай карчидиз:
Чида адаз хъсандиз
Лезги халкьдин адетар.
Ви хизанда кьит тахьуй
Берекатдин няметар.
Насруллаев Фейзуллагьаз – Кострома шегьерда авай «АвтоТранспорт44» ООО-дин генеральный директордиз:
Кеферпата улакьрин
Карханадин сагьиб я.
Хайи чIалаз гьуьрметун –
Адан руьгьдин таъсиб я.
Рамазанов Гьуьсейназ – «Опытный завод электроугольных изделий» АО-дин генеральный директордиз:
Хайи газет садрани
Алудзавач рикIелай.
Михьи цавни чими рагъ
Тахьуй кими кьилелай.
Садикьов Максимаз – Краснодарда яшамиш жезвай текивидиз:
Шалбуз дагъдин ценерив
ЧIехи хьанвай кьегьал я.
Хайи Ватан абад хьун
Адан рикIин хиял я.
Эмиргъаев Альбертаз – Алтайда яшамиш жезвай архитIви карчидиз:
Дагъустандиз хтайла,
Чаз мугьман хьун адет я.
«Лезги газет» ам патал
Руьгьдин чIехи девлет я.
Дагъустандин шегьеррани районра
Ахцегь районда
Абдулкеримов Магьмудаз – «Просвещение» фондунин регьбердиз:
Муаллим я вич чIехи —
Шумуд несил гьазурна.
Газет кхьинин рекье
Хъсан чешне къалурна.
Дербентда
Межидов Абилаз – РД-дин лайихлу юристдиз, писателдиз:
Къадим Дербент шегьерда
Ам газетдин кIеле я.
Ам паталди дидед чIал
Къанажагъдин бине я.
СтIал Сулейманан районда
Агъа СтIалрин хуьре авай кIвачин къапар цвадай «A-Stal» цехдин кьилевайбуруз:
Къуй куь цехдин бегьерар
Артух хьурай, бул хьурай!
Куь кIвалера, хизанра
Руьгьдиз чими къул хьурай!
Кьасумхуьрел алай «МУГ» ООО-дин кьилевайбуруз:
Еридиз лап хъсан тир
«МУГ»-да ава суьрсетар.
Гекъигайла, багьа туш
Маса гузвай къиметар.
Яралиев Имамаз – жемиятдинни сиясатдин зурба деятелдиз, РД-дин Халкьдин Собранидин депутатдиз:
Халкьдин хва я, зирекди,
Вич чаз гьакьван герекди.
Коллективдиз газетдин
Гьар са карда куьмек я.
Каспийскда
Алияров Маратаз – РД-дин Халкьдин Собранидин депутатдиз:
Мергьяматлу крарик
Вичин пайни кутазва.
Жумарт хва я халисан
Халкьдин къайгъу чIугвазвай.
Анжела Байрамбеговадиз – Республикадин образованидин центрадин директордиз:
Ада чIехи центрада
Зурба кIвалах тухузва.
Куьмек гунай газетдиз
Чна сагърай лугьузва.
Гьамидов Фахрудиназ – кьурагьви хциз, къуллугъчи меценатдиз:
Векил я ам Гиярдин,
Вични гьакьван заха я.
Хайи газет патал ам
Дамахни я, арха я.
«Дуьм-дуьз механикадин завод» карханадин кьилевайбуруз:
Заводдин тIвар машгьур хьун
Регьбердилай аслу я.
Куьн хьтинбур газетдин
Дамахни я, далу я.
Къулиев Рамазаназ – къурушви хциз:
Къулиеврин хтулди
Тухумдиз хас тегьерда
Хуьзва хайи лезги чIал
Гьам хуьре, гьам шегьерда.
Къулиев Расимаз – «Дагдизель» заводдин векилдиз:
Зегьметдал рикI хьайила,
Къастар кьилиз акъатда.
Вуна гузвай куьмекар
Чи рикIелай алатдач.
Махачкъалада
Адилов Магьарамаз – кIахцугъви карчидиз:
Мердвал хас я и касдиз,
Къилихдизни къени я.
Хайи чIални багъри чил
Адаз пара кIани я.
Азаев Жабираз – «Къуруш» центрадин регьбердиз:
Агъсакъалдиз баркалла,
Хуьзвай халкьдин адетар.
Хайи чIалал кIелзава
Журналарни газетар.
Асаханов Шагьпазаз – эминхуьруьнви карчидиз:
Эминхуьруьн векил я,
Пак ирс хуьзвай шаирдин.
Пешедай ам устад я
Кар алакьдай, магьир тир.
Баламирзоев Назимаз – ДГТУ-дин ректордиз:
Гъиле кьазвай кIвалахра
Агалкьунар аваз хьуй.
Вавай гьар са камуна
Четинвилер яргъаз хьуй!
Къадимов Русланаз – ДГПУ-дин филологиядин факультетдин декандиз:
Ам филфакдин декан я,
Халкьдин карда аслан я.
Адан руьгьдин дережа
Лап дагълар хьиз кьакьан я.
Къазимегьамедова Фаинадиз – ДГПУ-дин дагъустандин филологиядин факультетдин декандин заместителдиз:
Эдебият, хайи чIал
Ахтармишиз галатдач.
Имтигьанрин вилик ам
Ерли руьгьдай аватдач.
Мегьамедов Яминаз – диндин алимдиз:
Ислам диндин рекьева,
Мягькем иман рикIева.
Дин, чIал хуьнин крара
Даим вилик, кIвенкIвева.
Мегьамедкеримов Мурадаз – Урусатдин журналистрин Союздин Дагъустанда авай отделенидин ревизкомиссиядин председателдиз:
Хайи чилин къуллугъда
Акъвазнава зирекдиз.
Герек чIавуз гьасятда
Къведай кас я куьмекдиз.
Мирзегьасанов Насрудиназ – мектебдин директордиз:
Къайда хуьзвай векил я
Чирвилерин маканда.
Ви дережа датIана
Хьурай анжах кьакьанда.
Пирмегьамедов Разимаз – карчидиз:
Акъваздай туш къерехда —
Руьгь гьулдан хьиз лигим я.
Маса касдиз гайи гаф
Хуьдай халис итим я.
Рамазанов Рамазан – цIаяр кьуниз акси къурулушдин кьилин пешекардиз:
Мукъаятвал квадардач
Ада гьич са легьзеда.
Газет кхьидай вахтунда
Ава вилик жергеда.
Салагьов Агъаметаз – ДГТУ-дин преподавателдиз:
ЧIалал гьакьван рикI алай
Кьегьал хва я Игъиррин.
Къуй сан мадни артух хьуй
Ваз жезвай кьван хийиррин!
Тажибов Жамалдиназ – диндин межлисрин мирзедиз:
КIус кутадач гьарамдин,
Диндал гьакьван мягькем я.
Межлисрални гуьруьшрал
Алхишрин са алем я.
Шагьбанов Низамаз – 13-гимназиядин муаллимдиз:
Несилриз гуз чирвилер,
Дережа хуьз мектебдин.
Тербиядин кIвалахда
Фикир гузва эдебдиз.
Эседов Адилагьаз – карчидиз:
Мад са хци гьар йисуз
Хабар гузва вичикай.
ТуькIуьй вири тамамдиз
КIвалахар ви рикIик квай.
Яралиев Мурадаз – цилингви карчидиз:
Писателдин хцивай
Жедач маса жуьреда.
Тираж артух ийизва
Ада вири Куьреда.
Чпин тIварар раиж тавун тIалабай ватанэгьлийриз:
Къуй Аллагьди кьабулрай
Садакьаяр виридан!
Чи гьар са хуьр, гьар са кIвал
Хьурай мублагь, авадан!
«ЛЕЗГИ ГАЗЕТ»
