И йикъара чав чIулав хабар агакьна: 23-декабрдиз чи арадай хъсан инсан, шаир, чи виридан рикI алай Османова ФатIимат Бугьадиновна акъатна. ФатIимат Османова 1962- йисан 13-декабрдиз Кьасумхуьруьн райондин Курхуьрел лежбердин хизанда дидедиз хьана. 1969-йисуз Курхуьруьн юкьван мектебдин гьазурлухвилин классдиз фена. 1980-йисуз мектеб хъсан къиметралди акьалтIарна. Адахъ кIелунар давамардай къастар авай, амма буба кефсуз хьуникди ФатIиматан мурад кьилиз акъатнач.
Са йисалай кьадар–кьисметди ам Эминхуьруьз акъудна, хизан кутуна. Уьмуьрдин юлдашдихъ галаз санал хизанда вад велед чIехи авуна. Османоврин хизандиз хуьре еке гьуьрмет ава.
Шиирар кхьинал ФатIимат Османова перестройкадин йисара машгъул хьана. Адан сифте эсерар чкIизвай уьлкведикай, йикъалай-къуз багьа жезвай къиметрикай ва девирдин гьахъсузвилерикай тир.
Гуьгъуьнин йисара ада ашпазвилин курсар куьтягьна. Гьанлай къулухъ Эминхуьруьн юкьван мектебда ашпаз яз кIвалахна. Адан аялрал гзаф рикI алай. Аялризни ам кIандай. Гьар са инсандихъ галаз рахадай тегьер чидай ФатIиматаз мектебдин коллективдин арадани еке гьуьрмет авай. Мектебда жезвай гьар са мярекатдик ада вичин пай кутазвай.
ФатIимат Османовадин са кьадар шиирар манийриз элкъвенва. Халкьди абуруз хушвилелди яб гузва. Абурун арада «ЦIийи свас», «Гуьзетда», «Зи бахт», «Жегьилар», «Замира», «Муьгьуьббат», «Зи яр», «Хтулдиз», «Ша, зи яр», «Ягъа чамразни сусаз мани» ва масабур ава.
ФатIимат Османовадин экуь къамат чи мектебдин муаллимрин, ам чидайбурун ва аялрин рикIера гьамишалугъ яз амукьда. Аллагьди рагьметрай. Вири хизанрин, мукьва-кьилийрин чанар сагърай.
Эминхуьруьн А.Г.Саидован тIварцIихъ галай юкьван мектебдин
муаллимар, техработникар ва аялар.
