Дагъустанда къанун-къайда хуьдай органрин
141 къуллугъчидив цIийи кIвалерин куьлегар вахкана
16-январдиз Махачкъалада МВД-дин къуллугъчияр патал эцигнавай яшайишдин кIвалер ишлемишуниз талукьарнавай мярекат кьиле фена. Ана РД-дин Кьил Сергей Меликова, РФ-дин МВД-дин СКФО-да авай Кьилин Управленидин начальник Сергей Бачурина, РД-дин къенепатан крарин министр Абдурашид Мегьамедова иштиракна.
Дагъустандин Кьилин пресс-къуллугъди «Лезги газетдиз» хабар гайивал, къенепатан крарин къуллугъдин ветеранриз, къанун-къайда хуьдай органрин телеф хьайи къуллугъчийрин хизанриз, Украинада кьиле физвай махсус серенжемдин иштиракчийриз кьакьан гьавайрин кIвалерай, санлай къачурла, 141 квартира чара авуна.
Лагьана кIанда, и кIвалер, махсус программадин сергьятра аваз, государстводин бюджетдин такьатрихъ эцигнава. Абур къулай яшайиш кьиле тухун патал герек къвезвай вири тадаракралди таъминарнава. Квартирайра хъсан еридин ремонт авунва.
Сергей Меликова устIаррин кIвалахдилай разивал къалурна ва къанун-къайда хуьдай органрин къуллугъчийриз, хизанриз цIийи кIвалер мубаракна: «Ихьтин объектар ишлемишиз вахкудайла, Дагъустанда, Махачкъалада агьалийрин патай итиж авай хъсан еридин кIвалер эцигиз жезвайди, эцигна кIанзавайди кьатIузва. Авадан авунвай гьаят, спортдал машгъул жедай майдан, улакьар акъвазардай махсус пен галай. Кьилинди иердиз ва агьалияр патал къулайдиз эцигун я. Заз неинки са къанун-къайда хуьдай органрин къуллугъчияр, гьакI амай дагъустанвияр патални багьа тушир къиметрай куьруь девирда хъсан еридин къулай кIвалер эцигиз жезвайбуруз чахъ галаз алакъаяр хуьниз эвер гуз кIанзава. Ахьтин эцигунардайбурухъ игьтияж ава.
РФ-дин къенепатан крарин министерстводи кьабулнавай къарар (заз ам генерал-полковник Сергей Викторович Бачурина кьиле тухвай кIвалах галачиз кьабул тийидайдини чизвай) чпин гъилик кIвалахзавайбурун къайгъударвал чIугвазвай регьберрин къарар я. Кьакьан гьавайрин и кIвалера авай квартирайрин 80 процент МВД-дин ветеранриз кьисмет хьунал за шадвалзава. Вужар я а ветеранар? 2000-2014-йисара, чпин чанарни хаталувилик кутуна, республикадин мулкарал къанунсуздаказ яракьламиш хьанвай дестеяр терг авур кьегьалар! Къе чавай инанмишвилелди лугьуз жеда хьи, са тIимил кьванни гьахъвал гъалиб хьана: Дагъустандин кьилел ислягь, михьи цав хьун патал, чпин уьмуьр хаталувилик кутуна, женг чIугурбуруз яшайишдин кIвалер ганва. За квез виридаз и вакъиа рикIин сидкьидай мубаракзава ва ихьтин кIвалер эцигдай мумкинвал гайи программани давамарна кIанзава», — лагьана Сергей Меликова.
Гуьгъуьнлай мярекатдал РД-дин МВД-дин кьил Абдурашид Мегьамедов рахана. Ада и проектдин тереф хвейи ва и макьсадриз пулдин такьатар чара авур РФ-дин МВД-дин кьилевайбурун тIварцIихъ хуш келимаяр лагьана. Министрдин гафарай малум хьайивал, кIвалер эцигун патал чара авур такьатрикай саки 100 миллиондив агакьна кьенятдай мумкинвал хьана, и пул уьлкведин бюджетдиз вахкана. Гуьгъуьнлай и такьатар элкъвена республикадиз чара хъийидай къарар кьабул хъувуна ва абурун гьисабдай яшайишдин кIвалер маса къачун патал нубатда акъвазнавай къанун-къайда хуьдай органрин къуллугъчияр квартирайралди таъминардайвал я.
«Заз цIийи кIвалериз экъечIнавай вирибуруз и вакъиа мубаракиз кIанзава. Ватан патал къуллугъ авунай куьн сагърай! Зи фикирдалди, гьакьван четин, муракаб рехъ атIанвай чи къуллугъчийрин вилик государстводин хиве гзаф мажбурнамаяр ава. Иллаки — Дагъустандин къенепатан крарин министерстводин къуллугъчийрин вилик. Им чна куьн паталди авунвай виридалайни гъвечIи кар я», — лагьана А.Мегьамедова.
Сергей Бачуринан гафаралди, РФ-дин МВД-дин кьил Владимир Колокольцева къенепатан крарин къуллугъчияр яшайишдин кIвалералди таъминаруниз кьетIен фикир гузва. Дагъустанвийрив цIийи кIвалерин куьлегар вахкуни и кар нубатдин сеферда тестикьарзава. «За Владимир Александровичан патай квел виридал саламар агакьарзава ва цIийи кIвалер тебрикзава. ГьакIни заз РД-дин къенепатан крарин министр Абдурашид Мегьамедоваз, и кIвалер эцигунин карда иштиракай виридаз сагърай лугьуз кIанзава. РФ-дин МВД-дин кьилевайбур инлай кьулухъни къуллугъчийриз, ветеранриз яшайишдин рекьяй куьмекар гуз, абурун месэлаяр гьялунин карда иштиракиз гьазур я», — къейдна С.Бачурина.
Агьмед Магьмудов
