Журналистрин пешекарвилин суварин вилик – 12-январдиз – Махачкъалада и вакъиадихъ галаз алакъалу са шумуд мярекат кьиле фена. ИкI, Р.Гьамзатован тIварцIихъ галай милли ктабханада РД-дин Гьукуматдин Председатель Абдулмуслим Абдулмуслимова и юкъуз республикадин СМИ-рин векилрихъ галаз гуьруьш кьиле тухвана. Мярекат гатIундалди вилик ада ина «Дагъустан» чапханадин ктабрин туьквен ачухуниз талукьарнавай серенжемда иштиракна.
Гуьгъуьнлай ада республикадин СМИ-рин хиле зегьмет чIугвазвайбуруз РД-дин Кьил Сергей Меликован патай пешекарвилин сувар мубаракна ва печатдихъ авай къуватдикай вичин фикирар лагьана. Премьер-министрди гьакIни хабар гайивал, алай вахтунда Дагъустанда печатдин ва электронный 245 СМИ кардик ква, милли 13 чIалал 140-дав агакьна газетар чапдай акъатзава.
А.Абдулмуслимова, алатай йисан нетижаяр кьадайла, Дагъустандин журналистри Расул Гьамзатован юбилейдин сергьятра аваз тешкилай мярекатрикай, Украинада кьиле физвай махсус серенжемда иштиракзавай дагъустанвийрин агалкьунрикай агьалийрал вахтунда ва хъсан еридин материалар агакьарайдини къейдна.
Гуьгъуьнлай ада яргъал йисара СМИ-рин хиле намуслувилелди зегьмет чIугунай са жерге журналистрив государстводин шабагьар вахкана. Абурун арада Урусатдин журналистрин Союздин Дагъустанда авай отделенидин председатель, «Лезги газетдин» кьилин редактор Мегьамед Ибрагьимовни авай. РД-дин Гьукуматдин Председателдин къарардалди ам Дагъустан Республикадин Гьукуматдин Гьуьрметдин грамотадиз лайихлу хьана.
Гьа и юкъуз Махачкъалада Урусатдин журналистрин Союздин Дагъустанда авай отделениди тешкилнавай прессадин бални кьиле фена. Ана РД-дин информациядин ва печатдин Агентстводин кьил Абдуразакь Жамалутдинова, РД-дин рекъемрин рекьяй вилик финин министр Юрий Гьамзатова, РД-дин Халкьдин Собранидин депутат Марат Алиярова, жуьреба-жуьре министерствойрин кьилерин заместителри, СМИ-рин кьилин редакторри, журналистри иштиракна.
Балдин сергьятра аваз хейлин журналистрив «Дагъустандин къизилдин къелем» премия, гьуьрметдин грамотаяр, дипломар, пулдин пишкешар вахкана. «Лезги газетдин» кьилин редактордин заместитель Куругъли Ферзалиев РФ-дин журналистрин Союздин Дагъустанда авай отделенидин Гьуьрметдин грамотадиз, РФ-дин Госдумадин депутат Жамаладин Гьасанован патай Разивилин чарчизни пулдин пишкешдиз лайихлу хьана.
Агьмед Магьмудов
