Рекъемар раижнава

2023-йисан нетижайралди, Дагъустанда ишлемишиз вахканвай яшайишдин кIвалерин кьадар 30,8 процентдин артух хьанва. Идакай РД-дин эцигунрин, архитектурадин ва ЖКХ-дин министерстводин пресс-къуллугъди хабар гузва.

ИкI, алатай йисуз регионда 1 миллионни 315 агъзур кв. метр­­дин кьадарда аваз яшайишдин кIвалер ишлемишиз вахканва (къейд ийин хьи, пландик кутунвайди анжах 1,1 миллион­ кв.метр тир).

Гьа са вахтунда 2022-йисуз, Да­гъус­танда 1 миллионни­ 5 агъ­зур кв. метр­дикай ибарат яшайишдин кIва­лер вахканай­. ИкI, 2023-йисуз и рекъем, винидихъ къейднавайвал, 30,8 про­центдин­ гзаф хьанва.

Чешмеди гьакIни хабар гузвайвал, 2021-йисуз республикада вахканвай яшайишдин кIвалерин майданрин кьадар 1 миллионни 31 агъзур кв. метрдиз барабар тир.

Сифтегьанбурун сиягьда

Дагъустанда 2023-йисуз федеральный «Михьи яд» проектдин сергьятра аваз целди таъминардай 5 объект эцигунин кIвалахар кьиле тухвана. Идакай РД-дин зегьметдин ва яша­йишдин рекьяй вилик финин министерстводин те­леграм-ка­налди хабар гузва.

Чешмеди къейдзавайвал, Дагъустан уьлкведа и программадин бинедаллаз пулдин такьатар гзаф желбнавай вад региондин сиягьда ава.

Кьилди къачуртIа, алатай йисуз винидихъ къейднавай вад объектдикай сад (Чиркей-Буйнакск водовод) ишлемишиз вахканва. Амай кьуд объект эцигунин кIвалахар 2024-йисуз акьалтIарун фикирда кьунва.

67 хизан куьчарна

къайдадикай хкатнавай (аварийный) гьалда авай кIвалерай агьалияр­ куьчаруниз талукь махсус программа­дин сергьят­ра аваз, Дагъустанда 2023-йисуз 67 хизан (120 кас) цIийи кIва­­­лералди таъминарнава. Идакай «Да­гъустан» РИА-ди хабар гузва.

Чешмедин делилралди, алай вахтунда алава вад хизандихъ галаз­ ку­тIун­навай икьраррин жигьетдай кIвалах давам жезва.

РД-дин эцигунрин, архитектурадин ва ЖКХ-дин министерстводин пресс-къуллугъдин малуматралди, агьалияр цIийи кIвалериз куьчарун патал кьабулзавай серенжемриз чара авунвай такьатрин 90 процент харжнава.

Дагъустанда — цIийи электропоездар

Дагъустанди 2024-йисан эхирдалди алай аямдин цIийи кьуд электропоезд маса къачуда. Идакай РД-дин транспортдин ва рекьерин майишатдин министерстводин пресс-къуллугъди хабар гузва.

Ругуд вагондикай ибарат и улакьри «Хасавюрт-Махач­къала-Дербент» мар­шрутда кIвалахда.

Къейд ийин хьи, цIийи поездри къулайвилин ва хатасузвилин жигьетдай алай аямдин вири истемишунриз жаваб ­гузва.

15 процентдин артух хьанва

Дагъустанда авай тек са санитарный вертолетди 2023-йисуз агьалияр­ яша­миш жезвай яргъал чкайриз 200-далай виниз сеферра лув гана. Ала­тай йисан рекъемдив гекъигайла, им 15 процентдин гзаф я. Идакай РД-дин здравоохраненидин минис­терстводин пресс-къуллугъди хабар гузва.

Чешмеди къейдзавай­вал, 2022-йисуз санавиа­цияди 176 сеферда Да­гъус­­тандин яргъал чкайрай духтурханайрив 207 кас агакьарнай, абурукай 36 аялар тир. 2023-йисуз лагьайтIа, санитарный вертолетди 206 сеферда­ лув гана ва 244 кас (66 аял) сагъламвал мягькемар­ хъувун патал духтурханайрив агакьарна.

РикIел хкин: Дагъустанди санитарный вертолет 2019-йисуз «Здравоохра­нение» милли проектдин сергьятра аваз маса къачунай. Республикадин здравоохраненидин министерстводин пресс-къуллугъди хабар гузвайвал, улакь агьалийрив тади гьалда медици­надин рекьяй куьмек агакьарун патал­ герек тир вири тадаракралди таъминарнава. И карди гьатта лап четин гьалда авай агьалиярни медицинадин идарайрив вахтунда агакьардай мумкинвал гузва.

Гьазурайди — Муса  Агьмедов