2024-йисан 1-февралдилай дидевилин капиталдин кьадар артух жеда. Малум тирвал, и капиталдиз гьар йисуз гьа­къикъи инфляциядин дережада индексация талукь я. Россиядин экономикадин рекьяй вилик финин министерстводин баянрал асаслу яз, алатай йисан эхир­да инфляция 7,5 процентдикай ибарат ­хьана.

ИкI, 1-февралдилай, сад лагьай аял хьайила гузвай дидевилин капиталдин такьатрин кьадар саки 631 агъзур манатдал кьван хкаж жеда, кьвед лагьай аялдиз талукьди – 833,8 агъзур манатдал кьван.

Къейд ийин, 7,5 процентдин индексация сертификатда пулунин такьатрин са тайин пай тунвай диде-бубайривни агакьда. Ишлемиш тавунвай пул гьикьван гзаф хьайитIа, гьакьван адал алава пулни (индексациядилай кьулухъ) хкведа.

*  *  *

ЦIинин йисуз яшайишдин бязи посо­бийрин кьадарни артух жеда. Индексация­ кIвачел залан дишегьлийриз гузвай такьат­­ризни талукь я. И пособие зегьмет чIуг­ваз алакьзавай­ агьалияр патал тайинарнавай федераль­ный дережадин яшамиш хьунин агъа кIа­нин кьадардин бинедаллаз, 50%, 70%, 100% кьадарда аваз гузва. 2024-йисалай и такьатар 8422, 12633 ва 16844 агъзур манатдикай ибарат жеда.

17 йисан яшдив агакьдалди­ гьар вацра аялриз гузвай такьатарни гзаф жеда: 7494, 11242, 14989 агъзур манат.

Аял хьайила, са сеферда гузвай такьатрин кьадар цIи 24627 манатни 21 кепекдикай ибарат жеда.

Пособийрин кьадарар Россиядин регионра тайинарнавай яшамиш хьун патал лазим пулунин агъа кIанин кьадаррилай аслу жеда.

«Лезги газет»