Малум тирвал, чи ерийривай яргъарани къецепатани, чIехи уьлкведин жуьреба-жуьре пипIера хайи халкьдин баркаллу рухвайри, гьар жуьредин хилерай пешекарри, бажарагълу ксари гьакъисагъвилелди зегьмет чIугвазва.
Гьахьтинбурукай сад вичин ери-бине Зизикрин хуьряй тир Рафаэл Небиюлагьович Къемеров я. Ам вичин хизанни галаз Ханты-Мансийскдий автономный округдин (ХМАО-Югра) Нижневартовск шегьерда яшамиш жез гзаф йисар я. Ина Р. Къемерова «Нижневартовскнефтегеофизика» ПАО-дин перфораторный экспедицияда кIвалахзава, анин 405-партиядиз регьбервал гузва.
Августдин эхирдай ХМАО-дин меркез тир Ханты-Мансийскда нафтIадин ва газдин промышленностдин пешекарвилин йикъаз талукьарнавай гьар йисуз кьиле тухузвай «Юградин чIулав къизил» («Чёрное золото Югры-2023») конкурсдин нетижаяр кьуна. Мярекатда вишелай гзаф конкурсантри иштиракна. Абурун арада Рафаэл Небиюлагьовични авай. Конкурсдин комиссиядин къарардалди, чи ватанэгьлиди «Виридалайни хъсан промыслово-геофизическдин партия» рекьяй округда 2-чка кьуна.
Эхь, жув чIехи хьайи чиливай яргъа яшайиш кьиле тухун, лайихлудаказ зегьмет чIугун регьят кар туш. Гьелбетда, Р.Къемеровахъ вичин уьмуьрда ихьтин нетижа хьун баркалла гъидай кIвалах я.
Р.Къемеров 1976-йисан 3-сентябрдиз СтIал Сулейманан райондин тIебиатдин гуьрчег пипIерикай сад тир Зизикрин хуьре вичин саки вири уьмуьр муаллимвилиз бахшнавай Небиюлагьан хизанда дидедиз хьана. Аял ва жаван вахтар хайи хуьре акъатай ам гъвечIи чIавалай зегьметдал рикI алаз, гъиле кьур кIвалах кьилиз акъудун патал гьатта чанни серф ийиз вердиш хьана.
1993-йисуз Р.Къемерова юкьван школа акьалтIарна. 1994-1996-йисара жегьилди Киров шегьерда Россиядин Федерациядин къенепатан кьушунра аскервилин буржи кьилиз акъудна. Гуьгъуьнин йисар Р.Къемерова пешекарвал хкажуниз бахшна. 2003-йисуз ада Москвадин областдин Раменский шегьердин политехнический техникум куьтягьна.
Зегьметдин рехъ Рафаэл Небиюлагьовича 2001-йисуз Нягань шегьерда Тюмендин геофизикадин компанияда хъиткьинардайди яз кIвалахунилай башламишна. И карда адаз вичин халу, алим, Россиядин Федерациядин мяденрин лайихлу разведчик, Саламудин Жаруфович Рустамов чешне хьана.
2005-йисалай инихъ Р.Къемерова винидихъ тIвар кьунвай карханада кIвалахзава. Ам алакьунар авай ва къазанмишнавай агалкьунрал рази хьана акъваз тийидай, вичин кIвалахдикай инсанриз менфят хкатдай къайдада зегьмет чIугвазвай ксарикай я. Гъурбатда аватIани, Рафаэл Небиюлагьовича дагъвидиз хас къилихар квадарзавач: ам гзаф мугьман кIани, мукьва-кьилидихъ, яр-дустунихъ гьамиша гъил яргъи ийиз гьазур инсан я. Гьаниз килигна, адаз гьам вичин руководстводин ва коллективдин патай, гьамни чкадин агьалийринни санал яшамиш жезвай ватандашрин арада еке гьуьрмет ава.
Рафаэл Небиюлагьовича регьбервал гузвай партия вилик жергейра ава. Ада галатун течиз, гьатта нафтIадин четин мяденрани, тапшурмишнавай кIвалах вахтунилай вилик кьилиз акъудзава.
Вичин везифаяр гьакъисагъвилелди кьилиз акъудуниз килигна, Рафаэл Къемероваз са шумуд шабагь ганва. Ам геологиядин хел вилик тухуник еке пай кутунай гайи Россиядин геологиядин чIехи холдингдин (РОСГЕОЛОГИЯ) Гьуьрметдин грамотадин сагьибни я.
Жавабдар, чешнелу пешекар хьиз, Р.Къемеров хъсан хизандин кьилни я. Адан уьмуьрдин юлдашди кьилин категориядин муаллимди, шегьердин 11-школада кIвалахзава, чIехи гада Ислам студент я. ГъвечIи хва Гьамзади 4-классда кIелзава.
Зегьметда къазанмишнавай агалкьун мубарак авуналди, лугьуз кIанзава, чи мурад Рафаэл Небиюлагьовичахъ мягькем сагъвал, хушбахт яшайиш, кIвалахда агалкьунар хьун я.
Зарият Агъарагьимова
