«Лезги газетдин» кьилин редактор гьуьрметлу Мегьамед Ибрагьимоваз!
Вичин жергеяр кьери жезвай редакциядин коллективди Шагьабудин Шабатов яргъалди чIугур азардик рагьметдиз финин гьакъиндай хабар гайидалай кьулухъ кьвед лагьай гьафте башламиш хьанва. Амма зи рикIи и чIулав хабар агудзавач, адахъ агъаз кIанзавач. Гуя редакциядин 7-мертебадиз, са гьафте арадай тефенмаз, адан къуллугъчи Шабатов хкаж хьанмазди, ина халис илгьамдинни адалатдин мехъер башламиш жезва. Шабатова редакциядин суфрадал вичин эхиримжи теснифар, зи фикирдалди, виридалайни маналу эсер хьанвай, руьгьдин лувар Ханумаз бахшнавай шиир мад ва мад сеферда кIелзава. Чна адаз, мехъерик хьиз, гурлу капар язава.
Вичин кIвале редакциядин работникар, хейлин кьадар мугьманар ачух суфрадихъ дестейралди ацукьай Шабатов са бязи чпин сивел тIапIар алачир, наши ксаризни кваз гьуьрмет-хатур авур, абурун гуьгьуьлдик гьевес кутур кас хьана.
Чи газетдиз багъри халкьдин тIвар гайи камалэгьли, адан кьилин редактор хьайи Ибадуллагь Тагьирова лагьанай: «Шагьабудин бегьем жемятрин вилик вичин суфрани ачух рикI экIязавай, бажарагълу, уьтквем кас я».
Шабатоваз эвера
(Сифте и келимаяр ишлемишайди Дагъустандин халкьдин шаир Майрудин Бабаханов я)
Редакция сугъул хьанва,
Шабатоваз эвера!
Гуьгьуьларни рагъул хьанва,
Шабатоваз эвера!
Бажарагъдиз капар ягъиз,
Шабатоваз эвера!
Наши сивиз тIапIар ягъиз,
Шабатоваз эвера!
Чи рикIера амукьда вун,
Шабатоваз эвера!
Ви эсеррал ашукь я чун,
Шабатоваз эвера!..
Шабатован хизандиз хьанвай агъур дерт пайзавай Казим Казимов.
