Литературадинни художественный ва жемиятдинни сиясатдин «Самур» журналдин алай йисан эхиримжи 6-нумра кIелдайбурув агакьнава. Дагъустандин халкьдин писатель Абдуселим Исмаилова «Къизгъин вакъиайрин йис» кьил ганвай редактордин гафуна 2023-йисуз инсаният тажубар авур, инсанар къарсатмишай, къурхулувилик кутур агьвалатрикай веревирдер ийизва. Украинада кьиле физвай дяведин махсус серенжемдиз, ХАМАС-дин гьужумрин нетижада Израилди Палестинадин шегьерар, хуьрер барбатIзавай, агьалияр къирмишзавай, Дагъустандин са бязи жегьил дестейри Махачкъаладин аэропортунал гьужум авур гьерекатриз, США-ди, коллективный Западди Россиядин аксина тухузвай сиясатдиз вичин къимет гузва.
Нумрада гьакI А.Исмаилован шииррин «80-йисарин дафтаррай» цикл ва гьа вахтунда кхьиз гъиле кьуна, гила акьалтIарнавай «Арза» поэмани ава.
Еке чка писатель Нариман Ибрагьимован «Санал кIелайбур» цIийи повестди кьунва. Ана кьиле физвай вакъиаяр къенин девирдихъ галаз алакъалубур я. Советрин девирда тербия, чирвилер, пеше къачур, гзаф йисара Россияда педагог яз кIвалахай кьилин игит Тават ватандиз хтай вахт республикада бандитри, террористри кьил хкажнавай, къайдаяр хуьдай органрин са бязи къуллугъчийрини тахсиркарри саналди тир дестеяр тешкилнавай, законрал амал тийизвай чIавал ацалтнава. Руьгьдиз мягькем дишегьли дустарин куьмекни галаз кIеверай экъечIзава. Повестда кьиле физвай гьерекатар жанлубур, кIелзавайдаз таъсирдайбур я.
Айна Шалбузовадин шиирар кIелзавайбурун фикир желбдайбур я. Иллаки — дидеяр фикирдаваз теснифнавай эсерар. Авторди дидедин патай веледриз авай кIанивилин, ширинвилин деринвал, абур бахтлу хьун патал чIугвазвай зегьмет къалурзава.
«Гьикаят» паюна рагьметлу Якьуб Яралиеван, Тажидин Агьмедханован, КьепIир Селимбеган новеллаяр, гьикаяяр («РикIин ишигъ», «Жаза», «Японрин шал», «Агь, дяве…», «Гьуьжет», «Нисидин ккIалар») ганва.
Вичин макъалада Алибег Омарова рагьметлу шаир Абдул Фетягь милли эдебиятдиз атайвал, яратмишунра агалкьунар, кIелзавайбурун, дустарин арада гьуьрмет къазанмишайвал рикIел хкизва.
Абад Азадов
