Госдумадин просвещенидин рекьяй Комитетди РФ-дин просвещенидин министр Сергей Кравцовавай школайрин образованидин къурулушдиз черченидин тарсар хкунин мумкинвилиз килигун тIалабна. Комитетди гьисабзавайвал, школадин программада черченидин тарс тахьуни аялдин технический, пространственный ва яратмишунрин кьатIунрин дережа агъуз хьунал гъизва. Ихьтин аялривай гележегда инженервилин рекьяй образование къачун патал герек чирвилерин бине кутаз жезвач.
Къейдзавайвал, институтда технический пешекарвилер хкязавай гзаф пай студентар сад лагьай курсунилай кьулухъ маса рекьерал элячIзава. Вучиз лагьайтIа, черченидай программаяр абур патал акьалтIай муракаббур жезва.
Черченидин тарс мектебриз хкунин гьакъиндай сифте теклиф Крымдин депутатрин патай гьеле са йис идалай вилик атанай. Социальный сетра месэладиз талукь яз кьиле фейи веревирдери тестикьарайвал, чIехи пай агьалийри и теклифдин тереф хуьзва.
Чи мухбир
