Агьалийриз «Госкъуллугъар» порталдин куьмекдалди къачузвай электронный къуллугърин (услуги) нетижаяр МФЦ-дин идарада чарарал акъудиз ва тестикьариз жедай мумкинвал ава.
И кар патал порталда жуван хсуси кабинетдай герек документ хкягъа – адахъ «ПДФ» форматдин файл галкIурнаваз жеда. «Заявления» разделда «Бумажная копия в МФЦ» хкягъа, ахпа арзадин нумра кхьихь ва МФЦ-дин идарадиз алад. Тестикьарнавай документ къачун патал паспорт, «Госкъуллугъар» порталдин хсуси кабинетдай вуганвай арзадин нумра гваз хьун герек я. Эгер тешкилатдин ва я ИП-дин патахъай векилвалзаватIа, нотариусди тестикьарнавай доверенность чарасуз я.
«Зи документар» центрадин къуллугъчийри документ чарчел акъудда ва МФЦ-дин муьгьуьрдалди ам тестикьарда. Ихьтин документдихъ юридический къуват жезва. И жуьредин регьятвиликай республикадин агьалийривай МФЦ-дин вири идарайрай менфят къачуз жеда.
Аялриз ИНН
«Зи документар» центрайра аялриз ИНН туькIуьриз жеда. ТIвар кьунвай документ ихьтин дуьшуьшра герек хьун мумкин я:
— аялрин пособияр тайинардайла;
— ам образованидин органри истемишун мумкин я;
— ирс аялдин кIвачихъ ягъун патал;
— диде-бубади аял патал юзан тийидай объект маса къачудайла кьур налог эвез хъувун (налоговый вычет) патал документ туькIуьрдайла;
— санаторийдани курортда сагъарунин серенжемар кьилиз акъуддайла.
МФЦ-дин куьмекдалди аялдиз ИНН туькIуьрдайла, диде-бубадикай садан паспорт ва аялдин вичин хайивилин гьакъиндай шагьадатнама герек жеда. ИНН кIвалахдин 5 йикъан муддатда туькIуьрзава.
«Лезги газет»
