Бурж вахкун тавурла
15-декабрдиз Хасавюрт шегьердин полициядин дежурный частунив и юкъуз шегьердин базарда итимрин са десте къалмакъал хьайидакай хабар агакьна.
Полициядин къуллугъчияр тадиз чкадал фена. Абуру арадал атай чуьруькдин себеб чирна. Малум хьайивал, шегьердин базарда къаравул яз кIвалахзавай, Садовый поселокдай тир 20 йисан яшда авай агьалиди гаджетар авай туьквендин иесидивай буржуна, аламаз мобильный телефон къачуна. Телефондин тахминан къимет 120 агъзур манат я. Жегьилди чеб икьрар хьайи муддатда телефонрин туьквендин иесидив пул ахгакьарнач.
Туьквендин иеси жегьилдивай вичин пул вахчун патал базардал фена. Амма буржлуда пул вахкуник кьил кутунач. Гафарай гафариз фейидалай кьулухъ абур кукIунриз акъатна. Нетижада Хасавюрт райондин 38 йисан яшда авай агьали мефтIедиз ва бедендин маса чкайриз зиян хьуникди азарханадиз агакьарна.
Къалмакъал нянихъ туьквенчидинни адаз буржлудан ватанэгьлийрин, чирхчиррин арадани давам хъхьана. Алай вахтунда 20 йисан яшда авай, вичел шак фенвай агьали полициядин отделдиз хканва. И делилдай суд-дуван авун патал материал кIватIнава.
«Лезги газет»
