Дагъустандин Хатасузвилин советди республикадин агьалийриз рикIе чIуру ниятар аваз гьалдарзавайбурун чIалахъ тахьуниз ва къайда-къанундихъ галаз кьун тавунвай мярекатра, митингра иштирак тавуниз эвер гузва.
РикIел хкин, и йикъара соцсетра чи хийир такIан ксари ихтияр таганвай (несанкционированный) акцийра разисузвал къалурун патал иштиракуниз эвер гузвай хабарар чукIурзава.
«Ихьтин чIуру крарик кьил кутуниз къецепатан уьлквейрин, кьилди къачуртIа, Туьркиядин ва Украинадин, мулкарал алай экстремистрин кIватIалрин башчийри эвер гузва. Абурун макьсад республикада жемиятдинни сиясатдин гьалар пайгардикай хкудун я. Виликан вакъиайрин нетижади тестикьарзавайвал, нагьакьан крарик кьил кутазвай ксари чпи анра иштиракзавач, абуру яргъалай гуьзетзава.
Жегьилрихъ, студентрихъ элкъвена, лугьуз кIанзава: чIуру крарик кьил кутамир, гьатта эвер гунар квез чидай ксарилай къвезватIани ва я квез пулар гуда лугьуз хиве кьунар ийиз хьайитIани, агъамир садахъни! Абуру чпи хиве кьур крар, гафар садрани кьилиз акъуд тийидайди чир хьухь! Амма абурун гафар гьасятда дегиш хьун мумкин кар я. ЧIуру крарик кьил кутур куь гьал, гележег хъсанди жедач», — кхьенва Хатасузвилин советдин малуматда.
Дагъустандин Хатасузвилин советди ихтиярсуз митингра иштиракунай закондалди жавабдарвилиз чIугун агьалийрин рикIел хкизва. ИкI, гзаф инсанри санлай иштиракуналди, гуж гъалиб авуналди, ягъунар, цIаяр кягъунар галаз, эменни пуч авуналди, яракь, хъиткьинардай, зегьерламишдай шейэр ишлемишуналди кьилиз акъудзавай митингра иштиракунай, гьакIни гьукумдин векилриз аксивал къалурунай 8 йисалди азадвиликай магьрумзава, абур тешкилай ксар — 15 йисал къведалди.
Яшар тамам тахьанвай аялар, интернетдикай менфят къачуналди, къанунсуз крарал желб авунай законди 3 йисалди азадвиликай магьрум авунин жаза гун къалурнава.
«Лезги газет»
