Мукьвара Махачкъалада, «Дагъустан» чапханада, 300 экземплярдин тираж аваз лезгийрин машгьур гьикаятчи, муаллим Нажмудин Шихнабиева гьазурнавай «Халкьдин руьгьдин гевгьерар» тIвар алай ктаб чапдай акъатнава.
ЧIалал кьару гьар са ватанэгьлиди хьиз, Н.Шихнабиевани халкьдин тарихдиз, милли адетриз, фольклордиз итиж ийизва. ЦIийи ктаб чапдай акъудуналди, ада чи халкьдин сивин яратмишунар хуьнин, абур къвезмай несилрал агакьарунин кардик вичин лайихлу пайни кутунва. «Халкьдин руьгьдин гевгьерар» гьикаятчиди алатай асирдин 70-90-йисара кIватIай халкьдин манийрин, бендерин чIехи са кIватIал я.
Авторди сифте гафуна къейднавайвал, ктабда гьатнавай бендер ада Испикрин ва Шихидхуьруьн мектебра муаллим яз кIвалахай йисара, аялрин куьмекни галаз, СтIал Сулейманан райондин Гуьне патан хуьрерай кIватIна. Ихтилат Испикрин, Селенрин, Хтунрин Бутхуьруьн, Зугьрабахуьруьн, Шихидхуьруьн, Асалдхуьруьн, Пиперрин хуьрерикай физва. Гьайиф хьи, кIватIай материалрикай бязибур квахьна. Амайбурни тармар тахьуй лагьана, Н.Шихнабиева абур ктабдин жилдиник санал кIватIнава.
Къейд ийин хьи, цIийи ктабда агъзурдалай виниз манияр гьатнава. Адакай халкьдин сивин яратмишунар ахтармишзавай алимривай, мектебра кIелзавай аялривай, студентривай, манидарривай менфят къачуз жеда. «Халкьдин руьгьдин гевгьерар» «Лезги газетдин» редакциядай маса къачуз жеда. Къимет – 300 манат.
Чи мухбир
