Малум тирвал, Дагъустандин гзаф кьегьалри Донбассда кьиле тухузвай дяведин махсус серенжемда кьегьалвилер, ватанпересвал къалурзава. Идан гьакъиндай СтIал Сулейманан райондин кьил Саид Темирханован ва райондин «Куьредин хабарар» газетдин кьилин редактор Асият Мирзалиевадин тIварцIел Приморский крайда авай 82588-нумрадин войсковой частунин командир полковник М.Поздняковалай хтай чарчи шагьидвалзава. Ана къейднавайвал, танкарин 218-полкунин майор К.А. Насрулаева СВО-да игитвилер къалурзава.
Чарчяй малум жезвайвал, танкарин полкунин батальондин штабдин начальник Насрулаев Камал Азизович, эверунин тIвар (позывной) «Дербент», 1991-йисан 31-декабрдиз Туьркменистан Республикадин Парахат райондин Шатлык хуьре дидедиз хьана. Ам СтIал Сулейманан райондин Цмуррин хуьре яшамиш жезва.
2022-йисан 11-октябрдилай ада СВО-да къуллугъзава. 2023-йисан 5-октябрдиз хсуси лайихлувилерай, подразделинидиз савадлудаказ, кардин патахъай чирвал аваз ва таъсирлудаказ регьбервал гунай майор К.Насрулаев танкарин батальондин командирдин къуллугъдал тайинарна.
Камал Азизовича военный махсус серенжемда халис кьегьалвилер къалурзава. ИкI, 2023-йисан 4-июндиз Украинадин миллетбазри Времевский хкаж хьанвай терефдихъ чIехи гьужум башламишайла, лап четин ва залан участокда ада танкарин дестедиз регьбервал гана, абур чи далу патаз ахъайнач. Украинадин яракьлу къуватрин мурад 6 йикъан къене Азов гьуьлуьн къерехрив атун тир. Са женгина, «Дербентдин» регьбервилик кваз, чи аскерри душмандин даяхдин (опорный) пункт тергна. Хирер хьанвай чпин женгинин юлдашарни туна, абур кьулухъ кат хъувуниз мажбур хьана. 8 сят алатайла Украинадин 20 кас жаллатIрикай ибарат тир дестедиз, чинебадаказ атана, чпив виликдай гваз хьайи чка вахчуз кIан хьана. Ягъунрин къати женг гатIунна. Камал Насрулаев кьиле авай чи танкистри лишан кьадай алатар ишлемишуналди, чуьнуьх хьанвай украинвияр алай чка чирна, гуьлле гуналди, абур катуниз мажбурна.
Майор Насрулаева танкар 500 метрдин мензилдиз акъудна вири яракьрай гуьлле гунин тапшуругъ гана. «Дербентди» женгинин патахъай кар чиз ва таъсирлудаказ регьбервал гуналди, чи танкистри вилик эцигай женгинин тапшуругъ кьилиз акъудна.
Женгинин тапшуругъ чешнелудаказ кьилиз акъудунай ва къалурай жуьрэтлувиляй К.Насрулаеваз «Дирибашвиляй» ва «ВикIегьвиляй» медалар гана.
Хазран Кьасумов
