И йикъара СтIал Сулейманан районда спортдин какахьай жуьредин женгерай тешкилай Дагъустандин кIвенкIвечивилин акъажунри республикадин жуьреба-жуьре муниципалитетрай виридалайни викIегь пагьливанар санал кIватIна. Спортсменрин бягьсер, гъалибчийрив шабагьар вахкуниз талукьарнавай мярекат Сардархуьре авай комплексда кьиле фена.
Акъажунрин иштиракчияр эвел кьиляй СтIал Сулейманан райондин кьилин сад лагьай заместитель Лацис Оружева тебрикна. Ада къейд авурвал, и турнирдихъ, республикадин жуьреба-жуьре пипIерай атанвай спортсменрин арада дуствилин алакъаяр мягькемарунилай гъейри, спортдин рекьяй абурухъ авай устадвал артухарунин жигьетдайни еке метлеб ава. Муниципалитетдин кьилин заместителди виридахъ чандин сагъвал ва турнирда виридалайни викIегьбур, лайихлубур гъалиб хьун алхишна.
Гуьгъуьнлай иштиракчийрин тIварцIихъ хуш келимаяр райондин спортдин, туризмдин ва жегьилрин крарин рекьяй комитетдин директор Чингиз Абдулмежидова, дзюдодайни самбодай РФ-дин лайихлу тренер Садир Айвазова ва масабуру лагьана.
Къейд ийин хьи, набутрин Международный йикъаз талукьарнавай акъажунрин кьилин тешкилатчи винидихъ тIвар кьур комитет тир. Санлай къачурла, турнирда 10-17 йисарин яшара авай 130 спортсменди иштиракна.
Фикир желбдай къайдада кьиле фейи бягьсерин нетижада СтIал Сулейманан райондин команда 1-чкадиз лайихлу хьана. 2-чка – Мегьарамдхуьруьн, 3-чка Дербент райондин векилри кьуна.
Гъалибчийриз кубокар, медалар ва грамотаяр гана.
Агьмед Магьмудов
