1-3-декабрдиз Кьиблепатан Сахалинскда каратедай уьлкведин кIвенкIвечивал патал акъажунар кьиле фена. Ана Урусатдин 51 региондай 700-лай виниз спортсменри иштиракна. Федеральный «Спорт – уьмуьрдин къайда» проектдин сергьятра аваз тешкилнавай и турнир уьлкведин спортдин уьмуьрда лишанлу вакъиайрикай садаз элкъвена. Акъажунар спортдин рекьяй вердишвилер къачузвай «Восток» тIвар алай комплексда тешкилнавай.
Шад жедай кар ам я хьи, турнирда чи халкьдин векилрини иштиракна ва абур къизилдин медалриз лайихлу хьана. Ихтилат бине Ахцегь райондин КьакIарин хуьряй тир, алай вахтунда Саратов шегьерда яшамиш жезвай 3 сеферда Урусатдин чемпион, каратедай спортдин мастер, Саратовдин областдин лайихлу тренер Ихтибар Агьмедован рухвайрикай – кьве стхадикай – Агьмед ва Рустам Агьмедоврикай физва. Кьве стхадини чпин бубадин гъилик спортдай вердишвилер къачузва.
Уькведин дережада аваз кьиле фейи акъажунра гъалиб хьуни — Агьмедовриз Европадин кIвенкIвечивал патал къведай йисуз Тбилисида кьиле фидай акъажунра иштиракдай мумкинвал гана. Къуй абурухъ гьанани агалкьунар хьурай!
Агьмед Магьмудов
