Дагъустан Республикадин хуьруьн майишатдин ва недай суьрсетдин министерстводи 2018-йисуз грантрин къайдада государстводин патай куьмек гунин рекьиз 300 миллион манатдилай артух пул рекье тун пландик кутунва.
Министерстводин пресс-къуллугъди хабар гузвайвал, кIвалах гъиле кьазвай фермерриз куьмек гун патал 126,8 миллион манат, малдарвилин хизандин фермайрин кIвалах виликди тухун патал 180 миллион манат чара ийида.
Министерстводин делилралди, 2017-йисуз кIвалах гъиле кьазвай фермерриз куьмек патал грантрин такьатар конкурсда гъалиб хьайи 46 касдиз, малдарвилин хизандин фермайрин кIвалах виликди тухун патал — 17 иштиракчидиз ганай.
Лежбервилин (фермервилин) кIвалах гъиле кьазвай майишатрал ва хуьруьн майишатдин производстводал машгъул кьилдин карчийрал са кьадар четин месэлаяр гьалтзава, гьа жергедай яз абур сифтегьан капитал бес тахьунихъ галазни алакъалу я.
Идалайни гъейри, цIийи КФХ тешкилуни майишатдин дараматрин проектар гьазурунихъ, абур инженервилин сетрихъ галкIурунихъ, рекьер ва производстводин ва складрин объектрал физвай чкаяр туькIуьрунихъ галаз алакъалу ва хейлин маса харжияр истемишзава.
“Винидихъ тIвар кьунвай вири месэлаяр гьял тавунмаз, кIвалах гъиле кьазвай майишатривай базарда гьуьжетиз жедач ва чIехи пай дуьшуьшра абур чпин кIвалах гьатта сифтегьан кьве йисан вахтунда акъвазаруниз мажбур жезва. Идахъ галаз алакъалу яз, кIвалах гъиле кьазвай фермерриз винидихъ вичикай лагьанвай грантдикай хъсан куьмек жеда”, — малумарзава РД-дин хуьруьн майишатдин ва недай суьрсетдин министерстводи.
Къейдна кIанда хьи, грант къачуз кIанзавай майишатривай ийизвай асул истемишун КФХ регистрация авурдалай кьулухъ кьве йисалай гзаф тушиз вахт алатун я.
* * *
Дагъустандин лежберри зулуз цайи магьсулар кIватI хъувунин кIвалах давамарзава. Къенин йикъан делилралди зулун магьсулар 51,6 агъзур гектардай кIватIнава, хабар гузва Дагъустан Республикадин хуьруьн майишатдин ва недай суьрсетдин министерстводи. Санлай къачурла 104,1 агъзур тонн бегьер вахчунва. И карда виридалайни еке нетижаяр — 24,2 агъзур тонн — Хасавюрт райондин магьсулдарриз хьанва, хабар гузва министерстводи.
Чи мухбир
