Алатай гьафтедин эхирра Дагъустанди дяведин гьерекатар себеб яз катуниз мажбур хьанвай Палестинадин агьалийрин са шумуд десте кьабулна. РикIел хкин, республикадиз къецепатан уьлкведай санлай къачурла 200 агьали къведайвал я. Гьелелиг 150 кас кьабулнава, абурун чIехи пай дишегьлиярни аялар я. Махачкъаладин ракьун рекьин вокзалдик абур РД-дин Гьукуматдин Председатель Абдулмуслим Абдулмуслимова, Дагъустанда аялрин ихтиярар хуьнин рекьяй векил Марина Ежовади, РФ-дин МЧС-дин РД-да авай Управленидин кьил Нариман Къазимегьамедова ва жавабдар маса ксари къаршиламишна. Къейд ийин хьи, мугьманар патал республикадин ял ядай са шумуд санаторийда вири шартIар тешкилнава.
28-ноябрдиз Палестинадай атанвай агьалийрихъ галаз РД-дин Кьил Сергей Меликова гуьруьш кьиле тухвана. Сифте нубатда республикадин регьбер Газадин сектордай чара авачиз Дагъларин уьлкведиз куьч хьанвай палестинвияр патал тешкилнавай шартIарихъ галаз таниш хьана. Ял ядай базада абур патал яшайишдин рекьяй вири къулайвилер арадал гъанва: кIвалера чими я, телефондин алакъа, интернет къайдадик ква, вахт-вахтунда чими хуьрекар гузва, ял ядай, аялар къугъвадай майданар, аялри чирвилер къачудай класс ава. Идалай гъейри, ина югъ-йиф талгьуз, медицинадин пунктуни, психологри ва яшайишдин рекьяй къуллугъчийри кIвалахзава.
«Къе Дагъустанда куь кьилел атанвай бедбахтвилив къайгъусуздаказ эгечIзавай гьич са касни авач. Куьн паталди чун ина чалай алакьдай вири жуьредин къулайвилер тешкилиз гьазур я. Куьне куьн гуя хайи кIвалера авайбуру хьиз гьиссда. Гьа са вахтунда Дагъустандин тIебиатди, гьавади мукьвал-мукьвал куь рикIел ватан гъида. Элкъвена куьн кьунвай инсанар гьам руьгьдин, гьамни имандин жигьетдай квез мукьва инсанар я. Ша, илиф Дагъустандиз!» — лагьана Сергей Меликова гуьруьш ачухдайла.
Ада гьакIни къейд авурвал, республикади им уьмуьрдин четин шартIара гьатайбур кьабулзавай сад лагьай дуьшуьш туш.
«Дагъларин уьлкведин мугьманпересвилин къанунар ахьтинбур я хьи, ина мугьманди вич иесидилайни хъсандиз гьиссун герек я. Куь арада идалай виликни Урусатдиз атай, хъсандиз урус чIал чизвай ксар авайдакай чаз хабар ава. Идалай кьулухъ чун квез чи уьлкведа кIвалахдай чкаяр ва яшайишдин маса шартIар теклифиз гьазур жеда. Чна куьн герек вири затIаралди таъминарда. Аялар патал лагьайтIа, абуру чирвилер къачудай, урус чIални чирдай шартIар арадал гъида», — алава хъувуна региондин Кьили.
Гуьруьшдин вахтунда Палестинадай атанвай аялриз мектебда герек къведай вири затIар багъишна, 3 йис жедалди яшара авай бицIекривни савкьатар агакьна. Идалай гъейри, гьам чIехибур, гьамни аялар – вири чими пек-парталдалди таъминарнава.
Лагьана кIанда, чара авачиз чпин хайи ватан туна, Дагъустандиз атанвай мугьманриз куьмекар гуз гьазурбур Дагъустанда пара ава. Мисал яз, «05 ru» фирмадин регьберди датIана алакъадал хьун патал абуруз виридаз вичин патай телефонар пишкешнава.
Гаф кватай чкадал къейд ийин хьи, палестинвийриз куьмекар гуз кIанзавайбур патал Махачкъалада, РД-дин зегьметдин ва яшайишдин рекьяй вилик финин министерствода, махсус штаб арадал гъанва. И пунктунихъ галаз телефондин нумрайрин куьмекдалди алакъадиз экъечIиз жеда: 8-960-412-47-45; 63-03-62 (зенгер экуьнин сятдин 9-далай нянин 6-далди кьабулзава).
Сергей Меликовахъ галаз кьиле фейи гуьруьшдал палестинвийри чеб хушдиз кьабулунай вири дагъустанвийрин тIварцIихъ хуш келимаяр лагьана.
«Чун хайибур хьиз, кIанивилелди, чIехи гьуьрметдивди кьабулна. Куьн жуьреба-жуьре миллетрикай ибарат такабур ва чIехи халкь я. Куьн чи стхаярни вахар я ва къенин юкъуз куьн чи хизан я. Куьне чи игьтияжар фикир тагана тазвач, и кардай чна квез сагърай лугьузва. Чаз чизва, чун паталди куьне вири месэлаяр гьялда.
Чна вири Урусатдиз сагърай лугьузва. Чун уьлкведин Президент Владимир Путинав чIехи гьуьрметдивди эгечIзава ва куь куьмек чна гьиссзава.
Чи кIвалер тупарай яна барбатIнава, амма чи халкь феникс хьтин къуш хьиз я. Чна Газа цIийи кьилелай эхциг хъийида ва Палестинади Дагъустан гьич садрани рикIелай алуддач. Мад сеферда сагърай куьн, чи играми стхаярни вахар!» — лагьана Палестинадай атанвай Сакер Самира.
Агьмед Магьмудов
