29-ноябрдиз Махачкъалада Хуьруьн майишатдин ва гьялдай промышлен­ностдин къуллугъчидин йикъаз талукьарнавай мярекатар кьиле фена. Абурукай кар алайбур – хуьруьн майишатдин суьрсетдин мекерани республикадин АПК-дин карханайрин выставка – меркездин кьилин майдандал тешкилнавай.

Арбе йикъан экуьнин сятдин 9-далай гатIунна кьилин майдандал кьуд патахъай­ инсанар физвай. Ина Дагъус­тандин жуьре­ба-жуьре районри дагъви­ халкьарин медениятдиз, адетриз та­лукь милли майданар тешкилнавай. Ме­керадиз, выставкадиз килигиз атанвайбурун арада РД-дин Кьил Сергей Меликов, РД-дин Гьукуматдин Председатель Абдулмуслим Абдулмуслимов ва жавабдар маса ксар авай.

Региондин кьил са шумуд райондин майданрал илифна, зегьметкешриз пе­шекар­вилин сувар мубаракна, эхиримжи йисара республикадихъ хуьруьн майишатдин, АПК-дин хилера хьанвай агалкьунар къейдна.

«Къенин юкъуз чилел кIвалахза­вай­­бур уьлкведин халис ватанпересар­ я. Хуьруьн майишат чи республикадин экономикадин кар алай хилерикай­ сад я. Эхиримжи йисара гьам федеральный, гьамни региондин дережада аваз и хел вилик тухун, зегьметкешриз жуьреба-жуьре куьмекар гун патал са кьадар серенжемар кьабулнава. Чуьллера цIийи техника пайда жезва, цIийи карханаяр кардик акатзава…», — лагьана С.Меликова.

Къейд ийин хьи, 29-ноябрдиз Да­гъустанда кьве карханани ачухна: Къиз­ляр райондин Аверьяновка хуьре — не­кIедин суьрсет гьялдай завод, Сар-Сар хуьре – комплексдин компактный заст­ройка. Абур ачухуниз талукьарнавай мярекатда интернетдин алакъадин куьмекдалди Сергей Меликовани иштиракна.

ГьакIни республикадин Кьили и юкъуз­ хуьруьн майишатдин ва АПК-дин хилера­ тафаватлу хьайи са жерге дагъус­тан­вий­рив государстводин шабагьар вахкана.

Агьмед Магьмудов