Гьар са девирдихъ вичин къагьриманар ава. Алай секинсуз девирда, дуьньяда гьар жуьредин вакъиаярни дегишвилер кьиле физвай четин вахтунда, халкьдихъ рикI кузвай, чпелай алакьдай жуьредин крарик кьил ва къуьн кутазвай кьегьаларни чахъ авачиз туш. Гьа ихьтинбурукай садахъ галаз заз куьнни танишариз кIанзава. Ам чи республикадин меркезда яшамиш жезвай, вичин ери-бине СтIал Сулейманан райондин Пипер хуьряй тир ватанперес, спортсмен, жемиятдин деятель, райондин жегьилрин парламентдин председатель Девлетханов Фарид Асретович я.
Ф.Девлетханов зегьметчийрин хизанда чIехи хьана. Махачкъалада мектебда кIелна. 9-класс хъсан къиметралди куьтягьна, ам республикадин меркездин пешекарвилин училищедиз гьахьна. 2011-йисуз анаг кьударни вадар аваз акьалтIарай жегьил Ростовдин госуниверситетдин экономикадин факультетдик экечIна. РикIе еке къастар авай кьегьал хва университет акьалтIарайдалай кьулухъ, 2017- йисуз, армиядин жергейриз фена. Анай ам сержантвилин тIвар къазанмишна хтана.
КьетIен фикир Фарида спортдизни гузва. И рекьяйни адахъ гзаф агалкьунар ава. Кьилди къачуртIа, ада республикада, Россияда жегьилрин арада кьиле фейи гьар жуьредин акъажунра иштиракна, адакай шумудни са медалдин, кубокдин сагьиб хьана. Фаридан агалкьунрикайни алакьунрикай геждалди рахаз жеда, амма заз Фарид вичин хушуналди халкь патал зегьмет чIугвазвай, инсанрихъ галаз хуш рафтарвалдай, рикIикай хабар кьадай, абурун гьал, дуланажагъ виликамаз ахтармишдай, вичиз хийир къачун патал хсуси темягькарвилин къастар авачир инсанрикай сад тирди къейд ийиз кIанзава. Инсанар четин гьаларай акъудун патал ам вичелай алакьдай куьмекар гуз, рекьер жагъуриз, вилик эцигнавай месэлаяр кьилиз акъудиз алахъда. Адан уьмуьрдин метлеб са вич патал яшамиш хьун туш, ам халкь патал яшамиш жезва ва зегьмет чIугвазва.
Гьелбетда, мураддин рехъ акьван регьятди жедач, и рекье четинвилерни гьалт тавуна амукьдач. Кьилинди, четинвилериз дурум гун, четин уламрай экъечIиз чир хьун я эхир. Сагърай чебни, и уламра Фаридахъ вичин куьмекчиярни ава. Сада-садаз куьмек гуналди абуру хийирлу гзаф крар кьилиз акъудзава. Гзафни-гзаф Фарид ва адан куьмекчияр, аялрикай ва жегьилрикай халис инсанпересар ва ватандиз вафалу инсанар хкатун патал, абурухъ галаз «кIвалах тухуз» аквада. И жигьетдай ада райондин уьмуьрда чIугвазвай зегьмет кьетIендаказ къейд авуниз лайихлу я. Ада жуьреба-жуьре гуьруьшар, конкурсар, марафонар, спортдин рекьяй турнирар тухузва ва аялринни жегьилрин гьевес хкажун патал ада вичин харжийрихъ пишкешарни ийизва.
Чи мурад акьалтзавай несилдиз чешне тир Фарид Девлетхановахъ чандин мягькем сагъвал ва вилик эцигнавай мурадар кьилиз акъуддай къуватар хьун я. Чна адал дамахзава. Къуй чи лезги халкьдихъ Фарид хьтин баркаллу рухваяр мадни гзаф хьурай!
Макъала заз адаз бахшнавай «Ватандихъ рикI кудай велед» шиирдин цIараралди акьалтIариз кIанзава:
Ватандихъ рикI кудай велед
Хьурай гьар са дидедиз.
Пипер хуьруьхъ Фарид лугьуз
Ава кьегьал са ихьтин.
Къаншардиз вун экуьн гъетрен
Сегьер-сегьер къарагъда.
Аллагьдивай сифтени-сифте
Ислягьвилер тIалабда.
Кьабулрай ви тIалабунар
Азиз тир сад Аллагьди.
Мадни хьурай агалкьунар,
Дамахдайвал районди.
Нарима Балиева,
Герейханован хуьруьн 1-нумрадин юкьван школадин
лезги чIаланни литературадин муаллим
