Алатай гьафтеда Москвадин патав гвай Красногорскда, Алжирдай, Индиядай, Къазахстандай, Къиргъизистандай, Узбекистандай, Норвегиядай, Сербиядай, Туьркиядай, гьакIни чи уьлкведин 35 субъектдай тир 800-далай виниз спортсменрин иштираквал аваз грэпплингдай кьиле фейи дуьньядин ачух чемпионатда Россиядин хкянавай командади къизилдин 8 медаль къазанмишна.
Уьлкведин тIвар виниз хкажайбурун арада чи машгьур спортсменар, чпин ери-бине Ахцегь райондин Фиярин хуьряй тир Гьабиб Атлуев ва Артур Агъашириновни (66 кг-дин заланвал авайбурун арада) ава. И акъажунра чи ватанэгьлийри — Нуьсрет Гьуьсейнова (92 кг-дин заланвал авайбурун арада) ва Сабир Идрисова (76 кг-дин заланвал авайбурун арада) буьруьнждин медал къазанмишна.
Гь.Атлуева ва А.Агъаширинова чIехибурун арада чпин алакьунар къалуриз са акьван гзаф вахт туштIани, амма абурулай агалкьунар къазанмишиз алакьнава. Кьилди къачуртIа, алай вацран эвел кьилера Москвадин патав гвай Наро-Фоминск шегьерда грэпплингдай Россиядин Кубок патал акъажунар рикIел хкиз кIанзава. ИкI, чи уьлкведин саки вири регионрай тир спортсменрин иштираквал аваз кьиле фейи Кубокда Дагъустандин хкянавай командадик (гаф кватай чкадал лугьун лазим я хьи, чи республикадин команда и акъажунра 1-чкадиз лайихлу хьана) кваз иштиракай Артур Агъаширинова 66 кг-дал къведалди заланвал авайбурун арада — къизилдин, Гьабиб Атлуева гимишдин медалар къазанмишна. И агалкьунин нетижа яз, чи ватанэгьлийриз 2024-йисуз Европадин чемпионатда иштиракдай мумкинвал гузва.
***
И йикъара Хасавюртда азаддаказ кьуршахар кьунай Россиядин спортдин лайихлу мастер, дуьньядин Кубокдин сагьиб Ш.Умаханован экуь къаматдиз бахшнавай международный турнирда дуьньядин 14 уьлкведай тир 200-далай виниз спортсменри чпин устадвал къалурна. Дагъустандин хкянавай командади ана 1-чка кьуна. Къизилдин медалриз лайихлу хьайибурун арада вичин ери-бине Кьурагьай тир Рагьман Малагьмедовни (125 кг-дин заланвал авайбурун арада) ава. Акъажунра ада 4 бягьсни инанмишвилелди гъалибвал къазанмишуналди акьалтIарна.
***
И мукьвара Мегьарамдхуьре гъилералди кукIунай Россиядин спортдин мастер Къагьриман Агьмедханован экуь къаматдиз бахшна кьиле тухвай турнирда Дагъустандин жуьреба-жуьре пипIерай тир 150-далай виниз спортсменри чпин устадвал къалурна. Абурун арада СтIал Сулейманан райондин спортдин, туризмдин ва жегьилрин крарин рекьяй комитетди рекье тунвай жаванарни авай. КIвенкIвечи чкайриз лайихлу хьайибурун арада Зизикай тир Ислам Алиметов (тренер — Абдулагъа Мисриханов) ва Герейханован хуьруьнви Агьмед Рамазанов (тренер — Сулейман Нежведилов) ава.
Рагнеда Рамалданова
