Вичикай и ихтилат физвай Нисред Расимович Къазиханов гъвечlи чlавалай спортдиз, иллаки волейболдиз майилвалзавай, алакьунар авай спортсмен ва хъсан муаллим-тренер я. Ам 1985-йисуз Ахцегь райондин Калукрин хуьре муаллимдин хизанда дидедиз хьана. Хуьруьн мектеб ва 2008-йисуз Дербентдин “Юждаг” институтдин тарихдинни филологиядин факультет куьтягьна.
2014-йисалай Нисред Къазиханова Московский областдин Солнечногорский райондин Лунево поселокдин СОШ-да физкультурадин муаллим яз кlвалахзава. 2016-йисуз ада чирвилер гудай “Профессионал” центрада “Физкультура ва спорт: образованидин идарада теория ва тарсар гунин къайдаяр” программадай пешедин рекьяй гьазур хьунин курсар агалкьунралди куьтягьна ва тафаватлу диплом къачуна.
2014-йисалай Лунево хуьруьн спортдин клубда волейболдин тренер яз кlвалахзава. Нисред Расимович тренер хьизни, къугъвазвай волейболист хьизни Москва шегьердин Зеленоградский административный округдин ва Московский областдин Солнечногорский райондин волейболдин жуьреба-жуьре акъажунрин гъалибчи ва призер я. Алай вахтунда ам Москвадин буругърин техникадин ачух заводдин дестедик кваз къугъвазва.
2018-йисуз ада Москвадин ва и шегьердин патарив гвай мектебра кlелзавайбур патал волейболдин лига тешкилна. Гьар йисуз кьиле тухудай ихьтин турнир тешкилунин фикир адахъ фадлай авай.
“Ихьтин жуьредин турнир тешкилунин фикир захъ гьеле студент тир йисарилай авай, — лугьузва Нисред Къазиханова. — Мектебда кlелзавайбур патал гьар йисуз, футболдай хьиз, волейболдайни акъажунар тухун тавунин гъавурда зун сакlани акьазвачир. Ихьтин турнирра за жувани гьевесдивди иштиракдай. Анжах спортдин мектебрилай гъейри, муькуьнра саки ихьтин къугъунар” тухузвачир.
Н.Къазиханова, Дагъустанда авайлани, вичин таниш тренерриз жегьилар патал волейболдай вахт-вахтунда турнирар кьиле тухунин теклифар гудай. Амма месэладал кlукl гъун патал адаз тешкилуник къуьн кутадайбур жагъанач. Физкультурадин муаллим ва волейболдин тренер хьайидалай кьулухъ, аялрин ашкъи ва абуру волейболдиз ийизвай итиж акурла, Нисред Къазиханова мектебрин командайрин арада волейболдай вахт-вахтунда кьиле тухудай турнир тешкилунин месэла цlийи кьилелай къарагъарна. И сеферда рикlин мурад кьилиз акъудун патал адаз мектебдин директордин ва поселокдин спортдин клубдин патай гьакъикъи куьмек хьана. Ватанда мумкинвал хьаначтlани, гъурбатда Нисредан ниятди цуьк акъудна лагьайтlа жеда.
Тешкилатчивилин алакьунар авай спортсменди са куьруь вахтунда цlийи турнирдин къайда, мектебдин волейболдин лигадин сайт ва турнирдин махсус ярж туькlуьрна. Кьилинди, фикирдик квай кар бажармишун патал спонсорарни жагъурна.
Нисред Къазиханова кьил кутур турнирдин сад лагьай къугъунар и йисан 30-апрелдиз Луневский мектебдин спортзалда кьиле фена. Ана патарив гвай районрин, шегьеррин командайри иштиракна.Сифтегьан къугъунар кьиле фейидалай кьулухъ гележегда гьар йисуз вахт-вахтунда кьиле тухудай турнир тешкилунай Нисред Къазихановав хейлин спортсменрин, тренеррин патай чухсагъулдин келимаяр агакьнава.
Нисредахъ хейлин агалкьунар, махсус кубокар, грамотаяр ва маса савкьатар, ам Московский областда волейболдин хъсан тренеррин жергеда ава.
Жегьилрин арада волейбол машгьурунин мураддалди чи ватанэгьлиди ийизвай алахъунар нетижалубар ва тариф авуниз лайихлубур я.
Гьазурайди — Куругъли Ферзалиев
