Алай гьафтеда Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз кар алай са шумуд месэладиз талукьарнавай совещанияр кьиле фена. Кьилди къачуртIа, 21-ноябрдиз республикадин премьер-министрди Гьукуматдин членрихъ галаз Запорожьедин областдин Михайловский райондиз куьмек гун патал Дагъустанди кьабулзавай алава серенжемар веревирдна. Малум хьайивал, республикадин такьатрихъ тIвар кьунвай райондин образованидин идарайрин пищеблокра виликдай пландик кутун тавур ремонтдин кIвалахар кьиле тухуда.
Алатай гьафтеда А.Абдулмуслимова гайи буйругъ кьилиз акъудунин сергьятра аваз РД-дин карчивилин ва инвестицийрин рекьяй кардик квай Агентстводин пешекарри республикадин муниципалитетрин администрацийрин векилрихъ галаз санал шегьерра, районра, шегьре рекьерин къерехра къанунсуздаказ эцигнавай рекламайрин кьулар винел акъудун патал ахтармишунар кьиле тухвана. 21-ноябрдиз кьиле фейи совещанидал Махачкъаладин мэрдин сад лагьай заместитель Нариман Темуркаева хабар гайивал, тек са республикадин меркездин куьчейра и йикъара 70-далай виниз ихьтин кьулар алуднава.
ГьакIни и гьафтеда Дагъустандин Гьукуматда алай вахтунда вири дуьньядик къалабулух кутунвай Палестинада кьиле физвай гьалариз талукь совещанини кьиле фена. Адан кIвалахда МЧС-дин, МВД-дин, Роспотребнадзордин, РФ-дин къецепатан крарин министерстводин Махачкъалада авай Векилханадин, «Единая Россия» партиядин, министерствойрин векилри, вице-премьерри иштиракна.
Гуьруьш ачухдайла А.Абдулмуслимова къейд авурвал, Дагъустандин Кьил Сергей Меликова дяведин гьерекатар себеб яз Палестинадай катуниз мажбур хьанвай агьалияр республикада кьабулдай месэлаяр веревирд авун тапшурмишнавай. Якъин хьайивал, региондин регьбердин тапшуругъ кьилиз акъуднава.
«Исятда дуьньяда гьихьтин гьалар арадал атанватIа ва нетижаяр гьихьтинбур ятIа квез виридаз аквазва. Инсанар гьихьтин къуллугърал ва вужар яз хьайитIани, эгер абуру са тахсирни квачир дишегьлияр, кьуьзуьбур, аялар телефзаватIа, ахьтинбурун инсанвилихъ галаз са алакъани авач. Им зи хсуси фикир я.
Россиядин Федерациядин Президентдихъ и жигьетдай вичин фикир ава ва республикадин Кьили, Гьукуматди, Дагъларин уьлкведин халкьди Владимир Путинан тереф хуьзва. Чна Палестинадин агьалийриз чалай алакьдай вири жуьредин куьмекар гуда. Виридаз чизва, и йикъара Дагъустанди Газа сектордиз яшайишда герек къведай шейэр рекье тунва ва абур чкадив агакьнава. И кардик чпин пай кутур вирибуруз за сагърай лугьузва», — къейдна А.Абдулмуслимова.
Гуьгъуьнлай ада хабар гайивал, Дагъустан, дяведин гьерекатар себеб яз Палестинадай катуниз мажбур хьанвай 200 кас кьабулиз гьазур я.
«Мукьвара Палестинадай чи республикадиз 200-дав агакьна агьалияр атун вилив хуьзва. И гьафтеда абурукай 50 кас Махачкъаладиз къведа», — лагьана премьер-министрди.
Совещанидал малум хьайивал, къецепатан уьлкведай къвезвай мугьманар Къарабудахкент районда авай «Леззет» санаторийди кьабулда. Ана алай вахтунда вири жуьредин къулай шартIар тешкилнава. Идалайни гъейри, санаторийдин патав, Манаскент хуьре, мектеб, аялрин бахча ава. Анай меркездиз атунни четин месэла туш: арада авайди 30-40 километр рехъ я. Гьукуматдин Председателди гьакIни хабар гайивал, лазим хьайитIа, Палестинадин агьалияр кьабулун патал «Дельфин» тIвар алай мугьманханани гьазурнава.
«И жигьетдай кьабулзавай гьар са серенжем чна республикадин Кьилихъ галаз веревирдзава. Къецепатан уьлкведин агьалияр патал чкадал медицинадин рекьяй гузвай куьмекдилай гатIунна недай-хъвадай суьрсетдал, пек-парталдал къведалди – вири къайдадик хьун герек я. Чна абур гьар са шейиналди таъминарда», — къейдна премьер-министрди.
РД-дин зегьметдин ва яшайишдин рекьяй вилик финин министр Мурад Къазиеван докладдай малум хьайивал, Палестинадин агьалийриз неинки республикадин гьукумдин органар, гьакIни мергьяматлувилин фондар, кьилдин ксарни куьмекар гуз гьазур я. Адан гафаралди, «Леззет» санаторийда 3 сеферда тIуьн гун тешкилда. Чкадал яшайишдин жуьреба-жуьре хилерин къуллугъчияр жеда ва абуру игьтияж авай гьар са месэла гьялда.
Совещанидин нетижаяр кьадайла, А.Абдулмуслимова Палестинадай къвезвай агьалияр хъсан дережада аваз кьабулун патал махсус десте арадал гъун къарардиз къачунвайди къейдна. Адан кьиле премьер-министр Рамазан Жафаров тайинарнава.
Гегьеншдиз РД-дин Гьукуматдин сайтдай кIелиз жеда.
Агьмед Магьмудов
