Къе Израилдин кьушунри Палести­на­­дин Газа шегьер бар­батIза­вай, аял­риз, начагъбуруз, дишегьлий­риз инсаф тийиз, агьалияр къирмиш­за­вай­ саягъ акурла, алемдин халкьар, сагълам къуватар къарсатмиш жез­ва. Абуруз чпин ажугъ гьиниз ийи­да­тIа, бомбайрин, тупарин, ракетай­рин кIаник терг жезвай агъзурралди­ агьалийриз гьикI куьмекдатIа чизвач.­

Израилдин ва адан тереф хуьзвай­ США-дин, коллективный Западдин чап­хунчивилин гьужумдик акатнавай па­лестинвийрин гьакъиндай дагъус­тан­вийрини гьайиф чIугвазва, инсафсузар негьзава. КIеве гьатнавай халкьдиз дагъустанвийри рикIин сидкьидай куьмек гузва. И йикъара палестинвияр патал Дагъустандай кьве самолетда аваз саки 60 тонндив агакьна яшайишда герек жедай шейэр рекье туна. Идан гьакъиндай Дагъустан Республикадин Кьил Сергей Меликова вичин телеграмм – каналда хабар гана:

«Ачух, гегьенш, регьимлу рикIер авай дагъустанвийрал дамахзава. Чун патал дерт, чарадан аялар, яшлубур, дишегьлияр авайди туш. И кар чи халкьди вири вахтара къалурна. Военный махсус серенжемда авайбуруз куьмек гунин рекьяйни чи республика сифтегьанбурун жер­гейра чкадал ала. Дагъустанвийри залзаладик акатай Сириядин, Туьркиядин агьалийризни куьмек гана. Запорожьедин об­ластдин Михайловский райондин агьалийриз дуьзгуьн уьмуьр пайгардик кухтунин карда куьмек гун давамарзава. Къе чи агьалийри, вирида сад хьиз, Газадин агьалийрин терефни хуьзва.

Ивияр экъичзавай чуьруькдин сифте йикъарилай чна Дагъустандин муфтиятдихъ галаз кIеве гьатнавай инсанриз куьмек гудай рекьер жагъурзава. Абурукайни кар алайбур садвилелди дуьаяр авун ва палестинвийриз алакьдай куьмек гун я.

Зун Россиядин МЧС-дин регьбердилай пара рази я. Ада Дагъустандай куьмекдин пар авай самолетар , четин гьаларизни килиг тавуна, Египетдиз ракъурдай мумкинвал гана.

Лугьун лазим я хьи, мергьяматлувилин куьмек вири республикади кIватIна. «Инсан» ва «Михьи рикI» фондари чи гьар са агьалиди куьмекдик вичин пай кутун патал хъсан кIвалах тешкилна.

Аллагь рази жедай кардик динэгьлийри, карчийри, госорганрин къуллугъчийри, жергедин дагъустанвийри­ пай кутуналди чи садвал къалурна.  ГьакI хьайила, къе чна Газадиз  суьрсетдихъ, парталрихъ, медицинадин алатрихъ галаз санал чи инсанрин ри­кIерин чимивални, кIанивални ракъур­зава. Дагъустанвийри мергьяматлувилин 100 тонндилай виниз парар кIватIнава. Абур вири чна палестинвийрив агакьдайвал ийида», — къейдна региондин Кьили.

Абад  Азадов