СтIал Сулейманан райондин школайриз алатай гьафтеда цIийи пуд автобус хтана. Абурукай сад ЦIийи поселокдин ва кьвед Цмуррин инновациядин школайриз гана.
— Эхиримжи 5-6 йисан къене райондин школайриз цIийи са шумуд автобус хтана, и къайгъударвиляй чна Дагъустан Республикадин Кьил Сергей Меликоваз, образованидин ва илимдин министр Ягья Бучаеваз сагърай лугьузва, — лагьана автобусар школайрив вахкунин мярекатдал райондин кьил Саид Темирханова.
Цмуррин школадин директор Сергей Ежова къейд авурвал, цIийиз ганвай 2 автобусни кваз, гила школадихъ 4 автобус хьанва. И кардихъ вичин себебни ава: школадиз маса хуьрерай гъиз-хутахзавай кIелзавайбурун кьадар гзаф я. Идалайни гъейри, Цмурдал мукьвал тир вахтара школа-интернатни ачухда.
Хазран Кьасумов
* * *
Алатай гьафтеда Мегьарамдхуьруьн райондин мектебривни автотранспортдин 2 машин агакьна. 9-ноябрдиз Мегьарамдхуьруьн райондин кьил Фарид Агьмедова школаяр патал машинар образованидин идарайрив агакьарун патал мектебрин векилрихъ галаз гуьруьш кьиле тухвана. ЦIийи «Газель» микроавтобусрин куьлегар ада Гилийрин ва Мегьарамдхуьруьн М.Гьажиеван тIварунихъ галай 1-нумрадин школайрин директоррив вахкана, абуруз и кар мубаракна.
Фарид Агьмедовани, мектебрин директоррини республикадин Кьил Сергей Меликоваз ва талукь тир идарайрин руководстводиз райондин школайрин месэлайриз фикир гунай сагърай лагьана.
Чи мухбир
