2023-йисан 21-октябрдиз лезги халкьдин кьегьал хва, машгьур спортсмен, вичин ери-бине СтIал Сулейманан райондин Кьасумхуьрелай тир Икрам Алискерова Арабрин Сад Хьанвай Эмиратрин меркез Абу-Даби шегьерда UFC-дин 294-турнирда какахьай женгерай Бразилиядин патай экъечIай Ворли Алвесал, ам 1-раундда накаутдиз ракъуруналди, гъалибвал къачурдакай СМИ-дин такьатра гегьеншдаказ хабар ганай.
И йикъара Икрам Алискеров СтIал Сулейманан райондин кьил Саид Темирханова администрацияда шад гьалара къаршиламишна. Гуьруьшда райадминистрациядин, спортдин, туризмдин ва жегьилрин крарин рекьяй комитетдин векилри, ДЮСШ-рин тренерри-преподавателри, райондин информагентстводин журналистри иштиракна.
Саид Темирханова, машгьур чемпион Икрам Алискеров тебрикунихъ галаз санал, ада спортда къазанмишнавай агалкьунар къейдна, адал неинки райондин агьалийри, санлай вири дагъустанвийри, Россияди дамахзавайди лагьана.
— Икрам Сабировича дуьньядин дережада агалкьунар къазанмишиз са шумуд йис я, — къейдна Саид Темирханова. – Спортдин виридалайни чIехи ва кесерлу и тешкилатдиз кам къачун зурба агалкьун я. Чи районэгьлиди пешекарвилин спортда санлай 15 сеферда гъалибвал къазанмишнава. Мубарак авунихъ галаз сад хьиз, чаз Икрам Алискеровахъ мадни чIехи агалкьунар хьана кIанзава.
Алхишдин ва тебрикдин келимайрилай гуьгъуьниз Саид Темирханова Икрам Алискероваз райондин виридалайни чIехи шабагь – райондин Гьуьрметдин грамота ва мергьяматлувилин «Умуд» фондунин патай пулдин пишкеш гана.
Дамах гвачир, вич вине кьан тийидай Икрам Алискерован рахунар лап куьруьбур хьана: ада вич хушвилелди кьабулунай, бягьс тухудайла вичин тереф хуьнай Саид Темирхановаз, райондин вири агьалийриз рикIин сидкьидай сагърай лагьана.
Икрам Алискерова вичин гележегдин планрикай, кьилди къачуртIа, къведай йисан сифте кьилера – январдиз ва я февралдиз – кьиле тухудай нубатдин женгиникайни хабар гана.
Гуьруьшдал Икрам Алискерова Абу-Даби шегьерда гъалиб хьайидалай гуьгъуьниз лезги чIалал лагьай «дах, ваз за лагьанайни кукIвардайди я. ГьакI ийидайди я…» гафарни рикIел хкана.
Икрам Алискерова спортда къазанмишнавай агалкьунар мубарак авуналди, районда кардик квай спортдин, туризмдин ва жегьилрин крарин рекьяй комитетдин директор Чингиз Абдулмежидова къейд авурвал, райондиз хтайла, Икрама жегьилрихъ галаз гуьруьшар тешкилзава, абуруз ватанпересвилин насигьатар гузва. Мадни и йикъара машгьур спортсменди Кьулан СтIалрин спортдин залда жегьил спортсменриз мастер-классни къалурна.
Гуьруьшдал Икрам Алискероваз алхишдин ва тебрикдин келимаяр райадминистрациядин кьилин 1-заместитель Лацис Оружева, заместитель Абуталиб Фатулаева, ДЮСШ-дин тренерар-преподавателар тир Буба Бабаева, Ибрагьим Абдурагьманова, и макъаладин автордини лагьана.
Хазран Кьасумов
