Дуьньядин винел сагълам­ви­ле­­лай багьа затI авач, гьадалайни ба­гьа затI кар чидай духтур гьалтун я. Чи бубайрин мисалда лагьайвал, «мал квахьайди квахьна­, са чIал чидай касдал кьванни гьалтнайтIа».

И мукьвара зи патав, гзаф йисара муаллимвиле кIвалахна, алай вахтунда пенсияда авай Алискеров Эмирбег Ярметович атана. Ада завай гзаф тIалабна, вич кIвачел ахкьалдар хъувур Къурушрин хуьруьн участокдин больницада кIвалахзавай духтур-те­ра­певт Вердиханов Исмаилаз «Лезги газетдин» чинилай чухса­гъул малумарун. «Къуй вири Лезгистандиз чахъни Гиппократан кьи­нез вафалу духтурар авайди чир хьурай, герек татурай, чарасуз хьайитIа, ахьтин пешекар алай чка чир хьурай!» — лагьана ада.

Исмаил Шагьназаровича вичин­ пеше хва Нажибулладизни ис­тек­лу­ авуна. Мектеб къизилдин­ ме­дал­­далди акьалтIарай ам са фи­кирни тавуна Москвада авай Пиро­гован тIварунихъ галай мед­уни­вер­ситетдиз гьахьна. Анаг агал­кьун­ралди акьалтIарай Нажибуллади­ Н.В.Склифосовскийдин тIва­рунихъ галай НИИ-да «тади­ куьмекдал»­ кIвалахна, хирург А.В.Виш­нев­ский­дин тIварунихъ галай медицинадин центрада аспиран­ту­ра­ни куьтягьна, алай вахтунда винидихъ тIвар кьунвай НИИ-да кIвалах давамарзава.

Эмирбег муаллимдин тIалабун вичин мецелай за агъадихъ гузва:

— Кьве йис кьван тир за начагъвилин тIал чIугваз. Гзаф духтуррин­ кьилив фена, амма абурукай са куь­мекни хьанач. Абурукай куьмек тахьайла, зун чи Къурушрин учас­ток­дин больницадиз Исмаил духтурдин патав фена. Ада зи начагъвилиз куьмек хьун патал гайи насигьат­ри, кхьей дарманри зи начагъвал кьезиларна. Пешедиз, тарифдиз, гьуьрметдиз лайихлу тир Исмаил духтурдиз за сагърай лугьузва.

Мектебда кIелдай йисара Исмаил вири предметрай дерин чирвилер авай, художественный лите­ратурадин эсерар кIелунал рикI алай ученик тир. Жува тарс гайи аялрикай вини дережадин пешейрин сагьибар хьана халкьдиз, ватандиз къуллугъун, вафалу хьун, — им гьар са муаллимдин мурадни я, дамахни. Гзаф йисара Ис­ма­ил духтурди вичин пешедин ре­кьяй са инжиклувални авачиз, га­латун тийи­жиз халкьдиз къуллугъзава. Вичин лайихлу зегьметдай адаз жемятдин патай еке гьуьр­метни ава, къиметни. Къуй вахъ яшайиш­да, пешедин рекьяй мадни еке агалкьунар хьурай, гьуьрметлу духтур Исмаил Шагьназарович!

Гьажи Къазиев