16-18-ноябрдиз, Дагъустандин мулкунал, Каспийск шегьерда, международный «Каспийдин рекъемрин форум – 2023» мярекат кьиле физва. Форумда 600-далай гзаф ксари иштиракзава. Мярекатдин кьетIенвилерикай ва гуьзлемишзавай мугьманрикай саласа юкъуз республикадин журналистрихъ галаз хьайи гуьруьшдал РД-дин рекъемрин рекьяй виликди финин министр Юрий Гьамзатова суьгьбетна.
Ада хабар гайивал, цIийи жуьреда тешкилнаваз, сифте сеферда кьиле тухузвай и форумди республикадиз неинки Дагъустандай, гьакIни гьар жуьре маса уьлквейрай тир ва рекъемрин технологийрал элячIунин месэладал машгъул пешекарар желбнава.
Къейд ийин, икьван чIавалди, 7 йисан вахтунда, РД-дин рекъемрин рекьяй виликди финин министерство тешкилатчи яз, республикада региондин экономика ва государстводи идара авунин кIвалах рекъемламишунин месэлайриз талукь тир зурба «РИФ.Кавказ» интернет-форум кьиле тухуз хьанай.
«Гьайиф хьи, «РИФ.Кавказ» форумди чаз рекъемрин хиле садлагьана вилик фидай мумкинвал ганач. Гьаниз килигна, чна форум цIийи «къаматда» аваз тешкилун кьетIна. И кардин макьсад Каспий гьуьлуьн патав гвай уьлквейрин арада авай алакъаяр мягькемарун ва международный «Кеферпад – Кьиблепад» проект уьмуьрдиз кечирмишун патал лазим камар тайинарун, вилик акъваззавай месэлаяр веревирд авун я. И кар патал форумда иштиракзавай уьлквейрин векилар жуьреба-жуьре хилерай кIвалахдин дестейриз пайда – икI абурувай чпин уьлквеяр проект кьилиз акъудуниз гьазурлухвилин гьал ахтармишиз жеда. КIвалахдин дестейри гьакIни чпин уьлквейриз международный и проектдик экечIун патал вуч кими ятIа тайинарда», — хабар гана Ю.Гьамзатова.
Министрди малумарайвал, форумдин сергьятра аваз кар алай 5 месэла веревирдда: киберхатасузвал, транспорт ва логистика, туризм, экология, илим ва образование. Пешекарри чпин нетижалу проектрикай суьгьбетда ва жуьреба-жуьре хилер рекъемрин жигьетдай виликди тухун патал лазим тир серенжемар веревирдда.
Форумдин мугьманрин арада, малум хьайивал, Россиядин рекъемрин рекьяй виликди финин министр Максут Шадаев, Дагъустандин Кьил Сергей Меликов, Россиядин МИД-дин кьетIен тапшуругъар тамамардай посол Михаил Петраков, Россиядин ва адан патав гвай маса уьлквейрин – СНГ-дин иштиракчийрин арада авай сергьят тайинарунин крарай РФ-дин Президентдин махсус векил, Евразиядин халкьарин ассамблеядин генеральный секретарь Андрей Бельянинов, Ирандин алакъадин ва информациядин технологийрин министрдин заместитель Мейсам Абеди ва са жерге маса вини дережадин мугьманар ава. ВКС-дин къайдада форумдин кIвалахда Россиядин Президентдин куьмекчи, Государстводин Советдин секретарь Игорь Левитинани иштиракда.
Ирандин делегациядилай гъейри, форумда гьакIни Туьркменистандин, Узбекистандин векилар, СКФО-дин республикайрай, Туладин, Варонеждин, Астрахандин, Ростовдин областрай, Краснодардин крайдай тир пешекарар, уьлкведин маса пипIерай атанвай IT-бизнесдин къуллугъчияр ава.
Форумдин нетижада кIвалахдин дестейри президиумдиз «Кеферпад – Кьиблепад» проект нетижалудаказ уьмуьрдиз кечирмишун патал кьабулун герек тир серенжемрикай докладар авун лазим я. ГьакIни, мярекатдин сергьятра аваз, са шумуд уьлкведин сергьятра аваз къуватда жедай рекъемрин документрин сад тир стандартар гьазурун ва я тестикьарун теклифнава. Инал ихтилат проектдихъ галаз алакъалу вири уьлквейрин мулкарал къуватда жедай рекъемрин къулуникай, делилрин хатасузвиликай, логистика ва транспорт идара авуникай, тIебии тушир интеллект ишлемишунихъ галаз алакъалу проектрикай физва.
Жасмина Саидова
