Кьурагь райондин Штул хуьряй тир жегьил аскер Муртузалиев МегьамедтIагьир Амрудиновича Украинада кьиле физвай дяведин махсус серенжемда 2023-йисан майдилай иштиракзава. Ада 2013-йисуз Штула 9 йисан школа акьалтIарна, сифтедай колледжда, гуьгъуьнайни Дагъустандин исламдин университетда кIелунар давамарна. 2021-йисуз Махачкъала шегьерда С.Афандидин тIварунихъ галай мискIинда тешкилнавай курсара диндин месэлайрай гъвечIи аялриз тарсар гана. Ахпа Ставрополда мискIиндин имамдин куьмекчи яз, Краснодарда эцигунрал кIвалахна.
«Хайи Ватан кIеве авайла, завай къерех хьана акъвазиз хьанач, – лугьузва МегьамедтIагьира. — Чечняда зун спецназдин «Ахмат» отряддик экечIна. Женгинин гьазурвилер къачурла, чун Луганскдин Белогородка шегьердиз рекье туна. Нубатдин са женгина зал, хъитIрепIар галукьна, хер хьана. Хер сагъ хъхьай кьве гьафтедилай зун мад Ватан хуьзвайбурун жергеда акъваз хъувуна. Исятда, муьгьлетдикай менфят къачуна, зун хайи хуьруьз хтанва».
Адавай чна гележегдин планрикай хабар кьурла, ихьтин жаваб гана: «Чахъ, чи женгинин дустарихъ авай фикир-мурад анжах сад я: дяве чун гъалиб хьуналди фад куьтягьун». Чна МегьамедтIагьир Амрудиновичаз ва ам хьтин кьегьалриз гъалибвал гваз ва сагъ-саламатдиз хтун алхишзава.
Сабир Эфендиев
