2-ноябрдиз мергьяматлувилин «ЛЕКИ» фондуни Мегьарамдхуьре Кьиблепатан Дагъустандин мектебра кIелзавай ва лезги чIалал шиирар кхьизвай аялрин арада махсус конкурс кьиле тухвана. Асул гьисабдай ана 6-7-классра кIелзавайбуру иштиракна.
Мярекатдин кьилин макьсадрикай сад хайи чIал хуьн ва вилик тухун, аялрин арадай дидед чIалал шиирар кхьидай, абур фасагьатдиз кIелдай алакьунар авайбур винел акъудун тир.
Конкурсдин гьуьрметлу мугьманрин арада Лезги писателрин Союздин председатель, гьикаятчи Сардар Абил, МФТИ-дин муаллим, алим Азим Нуьгьов, «ЛЕКИ» фондунин векил Руслан Мегьтиханов, «Дагъустан» РГВК-да лезги чIалал эфирдиз акъатзавай передачаяр кьиле тухузвай жегьил шаир Владик Батманов, тарихчи Герман Мамедяров ва масабур авай.
Конкурсдин нетижаяр кьадайла, жюриди гъалибчияр яз пуд кас хкяна: 1-чка – СтIал Сулейманан райондин Курхуьруьн мектебдин 6-классдин ученица Анжела Рустамова (пулдин пишкеш – 20 агъзур манат); 2-чка – Мегьарамдхуьруьн райондин Филерин хуьруьн мектебдин 6-классдин ученик Ибрагьим Улубегов (пулдин пишкеш – 15 агъзур манат); 3-чка — СтIал Сулейманан райондин Курхуьруьн мектебдин 6-классдин ученица Гуьлмира Меликова (пулдин пишкеш – 10 агъзур манат).
Идалайни гъейри, хъсан шиирар кхьей ва кIелай мад 21 аялдиз 1 агъзур манатдин кьадарда аваз пулдин пишкешар гана.
«ЛЕКИ» фондунин векилди конкурс тешкилуник чIехи пай кутур, вичин бине Ахцегь райондай тир меценат Нариман Гъазалиеваз ва и карда куьмекар гайи вири юлдашриз сагърай лагьана.
Агьмед Магьмудов
