Алатай гьафтеда Урусатдин журналистрин Союздин председатель Владимир Соловьеван къарардалди Союздин Дагъустанда авай отделенидин ревизиядин комиссиядин председатель Мурад Федриянович Мегьамедкеримоваз «За заслуги перед профессиональным сообществом» лишан гана.
М.Мегьамедкеримов 2020-йисалай Урусатдин журналистрин Союздин член я. Бине СтIал Сулейманан райондин Агъа СтIалрин хуьряй тир ада гьар йисуз «Лезги газет» кхьиник чIехи пай кутазва: 110 хизандиз хайи чIалал акъатзавай кьилин газет кхьизва. Идалайни гъейри, хайи чIалахъ рикI кузвай чи ватанэгьлиди республикада лезги чIалаз талукьарна кьиле тухузвай олимпиадаяр, конкурсар, маса мярекатар тешкилдай куьмекар гузва.
И йикъара Дагъустанда авай отделениди СтIал Сулейманан районда тухвай «РикIел хуьнин багъ» серенжемдикни М.Мегьамедкеримова лайихлу пай кутуна.
Алай вахтунда Дагъустанда авай отделение патал РД-дин информациядин ва печатдин Агентстводи республикадин Печатдин кIвале чара авунвай кьве кабинет цIийикIа туькIуьр хъийизва. Чи ватанэгьлиди и кардани иштиракзава.
Чна Мурад Федрияновичаз лайихлу шабагь мубаракзава ва адахъ кIвалахдин рекье мадни еке агалкьунар хьун алхишзава.
Агьмед Магьмудов
