За чи рикI алай «Лезги газетда» (19-октябрдин 42-нумрадин 9-чина) Гьажиагъа Мегьамедшерифова кхьенвай ирсинин деринвал авай ва миже квай «Пак тир буржи» тIвар ганвай макъала лап дикъетдивди кIелна.

Даггосуниверситетдин тарихдин факультет куьтягьнавай тарихчи, макъала кхьей кас и мукьваралди Мегьамед Эфендиев чир тахьуналди завай тахсирлу ийиз­ жедач. Гьайиф хьи, школайра кIвалахзавай чи лезги чIалан муаллимриз ихьтин тарихдин важиблувал авай вакъиаяр къвезвай несилриз чирдай мумкинвал авач, бязи вахтара чпизни абурукай  чирвилер авач. ГьикI хьи, Урусатдин чIехи писатель, дуьньядин литературадин классик Лев Николаевич Толстоя 15 йиса авай, са тахсирни квачиз суьргуьндиз акъа­тай, етим лезги жегьилдиз къаюмвал авуникай, вичин кIвале хуьникай, кIелиз-кхьиз ва шикиларни кваз ягъиз чирайдакай, жегьилрин къвезмай уьмуьрдиз экв куькIуьрайдакай чи мектебрин ктабра са гъвечIи суьгьбет кьванни авач.  СикIерикайни къуьрерикай махар пара ава, ам­ма аялриз урусрин инсанрин ри­кIин чIехивал ва намуслувал ашкара ийидай, халкьар мадни мукьва хьана кIа­нардай чешнеяр, чна чуьнуьхна «сандухра туна» виже къведач.

Гьуьрметлу лезги чIаланни ли­­тературадин муаллимар! Сиф­те нубатда «Лезги газет» кхьихь куьне, ахпа тIвар кьунвай макъала­дикай ва къведай нумрай­ра жедайбурукайни менфят къачуна­, ам куь гъилик кIелзавай програм­мадилай къецяй кьиле­ тухузвай­ тарсара аялрив агакьарайтIа хъсан кар ­жеда.

Макъалада къарагъарнавай месэлаяр­ лап гьахълубур ва важиблубур я. Пуд паюникай ибарат тир «Жегьил дустагъ» ктаб чапдай акъуддай мумкинвилер жа­гъурна кIанда. Дербентда ракьун рекьерин вокзалдик квай, макъала кхьей касди вичин зегьметдал ва харжидал ачухнавай музейда са пIипI ваъ, адаз махсус музей ачухун лазим я. Идалди Мегьамед Эфендиеван эвледри чпин кIвале хуьзвай Лев Толстоянни чи ватанэгьлидин алакъайриз талукь пара шейэризни са экв аквадай, им хъсан кар жедай.

И важиблу месэладик кьил кутунвай Гьажиагъа Мегьамедшерифов пара сагърай!

Мукаил  Мукаилов,

РФ-дин АПО-дин

член-корреспондент,

РФ-дин кьилин пешекарвилин образованидин гьуьрметлу работник,

РД-дин лайихлу муаллим