Алай йисан 14-октябрдиз чешнелу хизандин кьил, вафалу дуст, бажарагълу тешкилатчи Мирзебас Абуталибович Жафаров рагьметдиз фена. Адан экуь къамат мукьва-кьилийрин, ярар-дустарин, санал кIвалахай юлдашрин рикIера эбеди яз амукьда.
М.А.Жафаров 1951-йисан 26-сентябрдиз Мегьарамдхуьруьн райондин ЦIелегуьнрин хуьре дидедиз хьана. Хайи хуьруьн мектебда 8-класс акьалтIарайдалай кьулухъ ам шофервилин курсарик экечIна. Гуьгъуьнлай хейлин йисара ада хайи хуьруьн «Серго» совхозда гьакъисагъвилелди зегьмет чIугуна.
1985-йисалай М.А.Жафарова тамухъан яз кIвалахиз гатIунна. И пешедиз ам вичин уьмуьрдин эхиримжи йикъалди вафалу яз амукьна.
Санал кIвалахай юлдашри къе Мирзебас Абуталибович ихтибариз жедай дуст, вичел тапшурмишай везифаяр намуслувилелди кьилиз акъуддай пешекар, жегьилрин хъсан насигьатчи яз рикIел хкизва. Ихьтин ерийри адаз гьам кIвалахзавай чкада, гьамни хуьруьн жемятдин арада гьуьрметни хатур къазанмишдай мумкинвал гана.
Лагьана кIанда, 2012-йисуз М.А.Жафаров Меккедиз гьаждални фена.
Чна Мирзебас Абуталибович рагьметдиз финихъ галаз алакъалу яз, дериндай хажалат чIугунивди, адан хизанриз башсагълугъвал гузва. Адан тIвар, къени крар чи рикIера амукьда.
Санал кIвалахай юлдашар, мукьва-кьилияр
