Литературадинни художест­венный ва жемиятдинни сиясатдин «Самур» журналдин вад лагьай нумра чапдай акъатнава. Дагъустандин халкьдин писатель Абдуселим Исмаилова «Регъуь хьухь» тIвар ганвай редактордин гафуна ватанпересвиликай, халкьдиз, уьлкведин регьберриз гьуьрмет авуникай, алай макъамда гьар са ватан­эгьлиди вич патал нин тереф хуьдатIа, гьадакай ихтилатзава. Гьа са вахтунда вири уьмуьрда властдиз къуллугъна, адакай жезмай кьван менфят къачуна, гила ам пислемишзавайбуруз «регъуь хьухь» лугьузва.

Алай аямдин бегьерлу шаиррикай сад тир Зулфикъар Къафланован цIийи шиирри, са рахунни алач, кIелзавайбурун фикир желбда. Вичиз хас тегьерда ва азаддиз кхьенвай бендерин, цIарарин темаяр жуьреба-жуьребур я. ТIебиатдин гьалар, вахтар, инсанрин хесетар, кIанивилин гьиссер, жаваб авачир муьгьуьббатдин гужар, яшайишдин къайгъуяр…

Еке чка  писатель Сардар Абилан «Бушлат» тIвар алай цIийи повестди кьунва. Ам къе уьлкведа ва къунши Украинада кьиле физвай вакъиайриз бахш­нава. Кьилин темани ватанпересвилихъ галаз алакъалу я.

«Самур» журналдиз сифте яз шаир Тамила Хуршидовадин шиирар ганва. Сифте гафуна Зулфикъар Къафланова кхьизва: «Милли литературадиз вичихъ хсуси хатI ва сес авай дишегьли атанва. Им шад жедай кар я».

«Гьикаят» паюна рагьметлу писатель Абдулбари Магьмудован новеллаяр, «Сатира ва юмор» паюна Абдуселим Ис­маи­лован гьикаяяр ганва.

Абад Азадов