Вири вахтуниз муьтIуьгъ я, вахт — са куьнизни, лугьузва мисалда. Йи­­къари­­ варцар, варцари йисар эвез ийиз, вахтуни датIана виликди­ ери­миш­да.­ Гьар са вахтунихъни вичин­ кье­тIенвилер, вичиз хас лишанар ава. Пи­чера цIаяр хъийидай вахт алукь­нава, кьуьдни  са акьван яргъал алач.

Стал Сулейманан райондин яша­йишдинни коммунальный майишат­дин объектар 2023-2024-йисарин­ цIа­­яр­ хъийидай сезондиз гьазур­ яни? И суалдиз жаваб жагъурунин­ мураддалди чун райондин «ЖКХ ва авадан­ламишун» МКУ-дин директор­­дин заместитель Мустафаев Мус­тафа Абу­­за­ровичахъ галаз гуьруьшмиш хьана. Агъадихъ чна адан суьгьбет гузва.

— Райондин администрацияди 2023-йисан 18-апрелдиз акъудай къарардин бинедаллаз ЖКХ-дин объектар цIаяр хъийидай сезондиз гьазурунин патахъай серенжемрин план ва комиссия тестикьарнава. Объектар гьазурунин кIвалахдал ада гуьзчивал тухузва.

Райондин мулкунал и важиблу мес­­эладай са кьадар кIвалахар тух­ван­ва.­ Кьилди умуми образованидин­ объектар къачуртIа, Герейханован­ 1-нумрадин аялрин бахчада чими­ ийи­­дай къу­ру­луш­ дегишарнава, Вини­ СтIалрин аялрин бах­чада, Агъа СтIалрин СОШ-да къа­занханаяр эцигнава, КIвар­чагъ­рин СОШ-да чими ийидай къурулуш бинеди­лай ремонтна, Вини Хъартасрин ва Агъа Хъартасрин мектебар газдин чими­вилел элячIна. КIахцугърин СОШ, Пи­пер­хуь­руьн, Татарханрин ва Ичинрин­ мектебар пичера цIай хъийидай бес кьа­дар (107 куб) кIарасралди таъминарнава.

Райондин газдин къуллугъди Кьасумхуьрел, Агъа СтIал-Къазмайрал шкафрин 4 пункт дегишарна.

Кьасумхуьрел Ленинан куьчеда 250 метрда, Рыночный куьчеда 30 метр­да, В.Набиеван куьчеда 200 метрда, Кьулан СтIалдал Ортастальский куьче­да 500 метрда, Альдерован куьчеда 250 метрда, Школьный куьчеда 120 метрда, Парковый куьчеда 70 метрда газдин линияр гуьнгуьна хтуна.

Агьалияр электричестводалди таъ­минарунин мураддалди Кьасумхуь­руьн электросетри «Касумкентская» подстанциядин 2-фидерда (Гуьне пад) 25 ва «Кировский» подстанцияд­ин 2-фидерда (КIварчагърин пад) кIарасдин 20  даях акIурна.

Шегьре рекьер чими ийидай сезондиз ишлемишиз гьазурунин мураддалди, «Касумкентский дорожно-ремонтный участок» ООО-ди 1600 квадратный метрда къирни бетон цанвай рекьера акъатнавай фурар-лекъвер къайдадиз хкана, 104600 квадратный метрда хирхем вегьенвай рекьер арадал хкана, 1200 метрдин ракьунни бетондин чIутхварар михьи авуна. 1 тонн технический кьел, 15 куб.  муркIариз акси материал гьазурнава. Бес тежезвай 15 тонн технический кьел ва 180 куб. муркIариз акси материал къачун патал «Дагавтодордиз» арза агакьарнава.

Чими ийидай къурулушри ара атIунар авачиз кIвалахун ва сагъламвилин идарайра санитариядинни чимивилин къайда арадал гъунин мураддалди райондин центральный больницада котёлрин тадаракар, электротадаракар ва къайдадикай хкатнавай­ турбайрин линияр ремонтнава, чими­ ийидай къурулушрин сваркадин кIва­лахар тамамарнава.

ХъуьтIуьн варцара кIвалах авуниз райондин культурадин идарайрани гьа­зурвал акунва. Райондин культурадин къурулушдик 5 идара, абурукай яз И.Гь.Тагьирован тIварцIихъ галай Россиядин халкьарин адетдин культурадин центр (ЦТКНР) ва сад авунвай библиотекайрин къурулуш (ЦБС) акатзава. ЦТКНР-дик чкайрал алай 35 филиал, ЦБС-дик 27 филиал акатзава. Хуьрерин культурадин 19 идарада газдалди чими ийидай къурулуш кардик ква, амайбура пичер ава.

2023-йисуз И.Тагьирован тIвар­цIихъ галай ЦТКНР-да пичер ремонт­ хъу­вуна, хуьрерин 17 библиотекадиз газ тухвана, 7 библиотекада пичер ава, 4 библиотека хсуси кIвалера кардик ква.

Газдалди чими ийидай вири объектар кIвалера цIай хъийидай сезондиз гьазур я. ЦБС цIийиз ремонт хъувунвай дараматдиз экъечIнава, алай вахтунда ана чими ийидай къурулуш кIвалахдай къайдада ава.

Хуьрерин 11 клубда пичер ава, абура кудай кIарасрин гьакъиндай тамарин майишатдихъ галаз икьрар хьун ва пул гун лазим я.

Санлай къачурла, райондин яша­йишдинни коммунальный объектар цIа­­яр хъийидай сезондиз гьазур я. ЖКХ-дин объектри ара атIунар авачиз кIвалахун патал 650 агъзур манатдин кьадарда аваз фонд тешкилнава, — акьалтIарна вичин суьгьбет Мустафа Мустафаева.

Хазран Кьасумов