Республикадин информациядин  «Дагъустан» агенствода гуьгьуьллубурун «Каспий» батальондин командиррихъ галаз журналистар гуьруьшмиш хьана. Батальондин командир Васи­лий Наумочкина ва замполит Рагьман Нурумханова лагьайвал, гуьгьуьллубурун батальон тамамвилелди тешкилнава. Ам 230 касдикай ибарат я. Гуьгьуьллубуру зур йи­­сан, 8 вацран ва са йисан муддатда икьрарар кутIуннава. Актив­нидаказ батальондик Тарумовка­, Къизляр, Докъузпара, Кьурагь, Къизилюрт районрин агьалияр экечIна. Батальондин иштиракчийрин чIехи пай яшар 40 йисалай виниз алатнавайбур я. Хейлинбуру жуьреба-жуьре чкайра кьиле фейи военный серенжемра иштиракнава.

— 30-октябрдиз чи батальон санал кIватI жеда, — лагьана В.Нау­мочкина.- Вири герек парталралди, шейэралди таъминарда. И кар республикадин Кьил Сергей Меликован гуьзчивилик ква. Лугьун лазим я хьи, 24 йисалай 64 йисалди яш хьанвай чи аскерар батальондиз ватанпересвилин руьгьди, государстводиз важиблу везифа кьилиз акъудунин карда куьмек гунин гьиссди, чпин телеф хьайи багърийрилай кьисас вахчунин къастуни гъанва. Сифтедай чун махсус лагердиз фида, ана гьазурлухвилин курс тухуда, алай аямдин яракьар ишлемишиз чирда.

В. Наумочкина къейд авурвал, гуьгьуьллубурун батальондик саки вири районрин агьалияр, гьа гьисабдай яз СтIал Сулейманан райондин векиларни экечIнава. Абурухъ галаз райондин кьил Саид Темирханов гуьруьшмиш хьана.

Райондин кьил Саид Темирха­нова лагьайвал, «Каспий» баталь­ондик экечIзавай дагъустанвий­ри стратегиядин метлеб авай тапшуругъар кьилиз акъудда. Гуьгьуьл­лубур герек вири парталралди, шейэралди таъминарунин, абу­­руз къулай шартIар тешкилунин, фидай частар тайинарунин месэлаяр Дагъустан Республикадин Кьил Сергей Меликова вичин гуьзчивилик кутунва.

Саид Темирханова гуьгьуьл­лубуруз гьукуматди яшайишдин­ ре­кьяй гузвай кьезилвилерикайни­ лагьана. ИкI, абурув военный къул­лугъчийриз талукь вири га­лай­­ви­лер агакьда. Женгинин гье­рекат­рин ветеран  я лагьай, яшар тамам жедалди страховой пенсия тайинардай, пулсуз герек дарманралди таъминардай, санаторийра, курортра сагъламвал мягькемардай, гуьгьуьллубурун батальонда­ къуллугъдайла бедендиз гайи зияндай эвездин пулар тайинарда. Гуьгьуьл­лубурун хизанривни яша­йишдин жигьетдай кьезилвилер агакьда.

Гьар вацра гузвай тайин мажибдилай гъейри гуьгьуьллу ас­кер­­риз республикадин резервный­ фондунай са сеферда пул гуда. СтIал Сулейманан районди «Каспий» батальондик экечI­за­­вайбуруз мергьяматлувилин «Умуд» фондунайни 100 агъзур манат гузва.

СВО-да иштиракзавай аскерриз хьиз, гуьгьуьллубурун тIвар­цIихъни гьар садан хизандин, яша­­йишдин гьал, игьтияжар къалурзавай яшайишдин паспорт туь­кIуьрда. И кар фикирда кьуна, СтIал Сулейманан райондин администрацияди СВО-дин иштиракчийрин хизанриз яшайишдин рекьяй герек куьмекар гунин месэла вичин гуьзчивиликай хкудзавач.

Уьлкведин ва чи республикадин регьберрин стратегиядин тапшуругъар тамамарунин гьакъиндай чпин хивез жавабдарвал къачунвай викIегь, дирибаш кьегьалриз Саид Темирханова сагърай ла­гьана. Командирри вилик эцигзавай тапшуругъар жуьрэтлувилелди кьилиз акъудна, гъалибвал къазанмишна, сагъ-саламатдиз хи­занрин патав хтун алхишна.

Абад Азадов