Украинада кьиле физвай махсус серенжемда Кьурагь райондин векилрини дирибашвилелди иштиракзава. Гьайиф хьи, женгера игитвилелди телеф жезвай аскеррин гьакъиндайни малуматар агакьзава.

И йикъара райондин админист­рациядин кьил За­мир­ Азизова Кье­пIиррин хуьряй тир аскер Абду­рагь­ман­ Магьмудован диде-буб­а­див «Жуьрэтлувиляй» орден вахкана.

Абдурагьман Магьмудов махсус серенжемдив эге­чIай вах­ту­нилай вичин буржи кьилиз акъуд­завай ас­кер тир. 2023-йисан 14-январдиз миллетбазрихъ галаз нубатдин женг тухудайла, душмандин гуьлледи адаз инсафнач.

ВикIегь аскердин  буба Алибегаз ва диде Зибейдадиз башсагълугъвал гунихъ галаз, абурув орден Кьурагь райондин администрациядин кьил Замир Азизовани СтIал Сулейманан ва Кьурагь районрин военный комиссар Райзудин Женнетова вахкана.

— Абдурагьман Ватандал рикI алай уьтквем хва тир, — лагьана З.Азизова.- Адан игитвал къвезмай несилризни хъсан чешне жеда. Хайи ватан патал ча­нар гайи кьегьалар чна гьамиша рикIел хуьда, абурун диде-бубайрин гьакъиндай къайгъударвал чIугвада.

Абад Азадов