Чи ватанэгьлияр – гьар сана
Чи уьлкведин гуьрчег ва къулай шегьеррикай сад тир Краснодарда агьалийриз медицинадин рекье, сагъламвал мягькемарунин карда къуллугъзавайбурун арада лезгиярни, гьа жергедай яз Реваз Куругълиевни ава.
Реваз Абидинович Куругълиев 1976-йисан 29-ноябрдиз Ставрополдин крайдин Георгиевский райондин Новоульяновский поселокда дидедиз хьана. 1994-йисуз ина юкьван мектеб куьтягьна, 1994-2001-йисара Кубандин государстводин медакадемияда «лечебное дело» пешедай кIелна, 2002-йисуз хирургиядин пешедай интернатурани акьалтIарна.
2002-йисалай инихъ Р.Куругълиева Краснодардин медицинадин тади куьмекдин азарханада хирургвиле кIвалахзава.
Тежриба хьанвай пешекарди вичин патав куьмек кIанз къвезвай азарлу инсанар вичелай рази авуниз, абурун сагъламвилихъ пешекарвилелди гелкъуьниз кьетIен фикир гузва. Сир туш хьи, къенин девирда медицинадин хелни йигин камаралди вилик физва, цIийи жуьредин тадаракар, технологияр пайда жезва. Чи аямдихъ галаз кьадай, къенин юкъуз игьтияж авай, цIийивилерикай устадвилелди менфят къачуз чидай духтурдин дережа хуьн патал Р.Куругълиева вахт-вахтунда хирургиядиз талукь цIийивилер чирзава. Гьар йисуз 150-дав агакьна операцияр кьилиз акъудзава. Гзаф йисарин гьакъисагъ зегьметдай адаз гьуьрметдин грамотаяр, чухсагъулдин чарар ганва.
Р.Куругълиеван ери-бине Докъузпара райондин Къалажухрин хуьряй я. Адан чIехи буба Пиругъли Куругълиева Ватандин ЧIехи дяведа викIегьвилелди иштиракна, гуьгъуьнлай хейлин йисара хайи мектебда акьалтзавай несилдиз чирвилерни тербия гана. Ам орденрин, медалрин ва маса шабагьрин сагьиб тир…
Герек атай макъамда Реваз духтурди масанра яшамиш жезвай чирхчирриз, ватанэгьлийриз, мукьвабуруз медицинадин рекьяй гьам меслятралди, гьам хирургиядин рекьяйни куьмекар гузва. Гьич садрани Гиппократан кьин рикIелай алуд тийизвай духтур гьар са начагъдав селигъалувилелди, дикъетлувилелди эгечIзава. КIвалахдиз, пешедиз ихьтин рафтарвал къалурзавайвиляй адахъ къуллугъдин рекьяй юлдашрин, коллективдин арада гьуьрмет ава.
Зал интернетдин сайтра Реваз духтурдин тIварцIихъ адакай куьмек хьайи инсанри кхьенвай разивилин, алхишрин келимаяр гьалтна. Месела, са касди ихьтин гафар кхьенва: «Пара хъсан, дикъетлу, тежрибалу хирург я. Залан азардик квай зи бубадин кIвач сагъар хъувуна… Еке чухсагъул квез».
«ТIарвал себеб яз, зун азарханадиз фена. Духтур Реваз Абидиновичаз зи тIалдин себеб жагъана, йифен береда ада тади гьалда операция авуна. Сифтедай заз маса азар авай хьиз хьанай, амма зун гъалатI тир. Аллагьди квез сагъвал гурай!» — кхьенва маса краснодарвиди.
Духтурдихъ вичин регьят тушир кIвалахдай агалкьунар, къуватар хьана кIанзавайвилин келимаяр кхьинилай гъейри, шегьерэгьлийри ам неинки пешекар духтур, гьакI ачух рикI авай хъсан инсанни я лугьуз къейдзава.
Зи фикирдалди, кар чиз, пешедал рикI алаз кIвалахзавай касди агьалийрин патай къвезвай алхишар виридалайни хъсан шабагьар яз гьисабда.
Чи мухбир
