МВД-дин хроникадай
Дагъустандин МВД-дин пресс-къуллугъди хабар гузвайвал, Хасавюрт шегьердин агьалидал (дишегьлидал) метягьар маса гудайла лутувал авунай шак физва.
Онлайн жуьреда метягьар маса гунин карда рехъ ганвай лутувилин делил полициядин къуллугъчиди дуьздал акъудна. Малумарзавайвал, идалай виликни полициядин къуллугъчийрин дикъетдик акатай 22 йисан яшда авай шегьерэгьлиди и йисан эвел кьилера са мессенджерда дишегьлийрин парталар маса гуниз талукьарнавай аккаунт арадал гъана.
Алай йисан августдиз адавай Ставрополда яшамиш жезвай дишегьлидиз 75 агъзур манатдин къимет авай метягь къачуз кIан хьана. Метягь чкадал агакьарунин икьрардал атайдалай кьулухъ муьштериди алверчидин банкунин картадиз 75 агъзур манат пул ракъурна. Амма, шак физвайда хиве кьурвал, ракъурдай метягь адахъ авачир. Гьа икI, чIуру ниятдалди алверчиди муьштери алцурарна ва адан пул вичиз къачуна.
Тахсиркарвилин лишанриз килигна, РФ-дин УК-дин 159-статьядин 2-паюнай (лутувал) уголовный дело къарагъарнава.
«Лезги газет»
