Россиядин Федерациядин Госдумадин депутат Абдулгьаким Гьажиева Украинада кьиле тухузвай дяведин махсус серенжемда иштиракзавай ватанэгьлийриз вичин патай четин уламрайни экъечIиз жедай кьве автомашин пишкешна.
Депутатди лагьайвал, ада саки гьар юкъуз Дагъустандин аскеррихъ галаз алакъа хуьзва. Абурун игьтияжар чирзава. Нубатдин сеферда алакъалу хьайила, аскерри «Буханка» УАЗ машинар бес тежезвайдакай, абур чарасуз герекзавайдакай лагьана.
«Буханка» маркадин машинар датIана женгер кьиле физвай чкайра жезва, абурун куьмекдалди аскерар лазим чкайриз агакьарзава, хер хьайибур хкизва. Гьелбетда, автомашинар душмандин гуьллейрик, дронрин ягъунрикни акатзава. Гьавиляй абурухъ игьтияжни ава.
Къейд авурвал, автомашинар маса къачуз ва СВО-дин иштиракчийриз рекье тваз Къизилюрт райондин администрацияди ва жумарт дагъустанвийри куьмекна.
— Кар алай кьилин месэла Ватандин вилик чпин буржи тамамарзавай чи игитриз куьмек гун я, абур сагъ-саламатдиз амукьдайвал. И жуьредин кIвалах чна мадни давамарда, — къейд авуна депутатди.
Чи мухбир
