Инсан рикIел аламай кьван, адал чан аламайди яз гьисабиз жеда лугьуда. Инсан рикIел хуьн, адан хъсан крар квадар тавун – им адаз ийизвай гьуьрметдин лишан я. Ихьтин, яни жуван хуьруьнэгьлидин — СВО-дин женгера телеф хьайи кьегьал, «Жуьрэтлувиляй» ордендин сагьиб рагьметлу Ибрагьим Османован — экуь къамат рикIера хуьнин фикирдал алаз, акьалтзавай несилдиз адан ватанпересвилин, инсанпересвилин, жуьрэтлувилин инанмишвилерикай суьгьбетун, чирун ва чешне хьун, гьакIни жегьилар сагълам, къени крарал тупламишун патал 22-октябрдиз Мегьарамдхуьруьн райондин Гилийрин хуьре спортдин милли жуьрейрай (цIил ялунай, ченеяр акъудунай, гиряяр хкажунай ва икI мад) турнир кьиле фена.
Базардин йикъан сятдин 10-даз хуьруьн мектебдин гьаятда башламишай и турнирдиз хуьруьн ва патарив гвай чкайрин гзаф кьадар агьалияр, иллаки жегьилар кIватI хьана. Программадик квай акъажунра абуру гьевеслудаказ иштиракна. КIватI хьанвай ксариз тIуьн гун патал хуьруьнвийрин такьатрихъ аш, чай гьазурнавай. Акъажунра гъалиб хьайибуруз спонсордин пулунихъ къачунвай пишкешар гана.
Малум хьайивал, мярекат Гилийрин хуьруьн мискIиндин имам Жабраил Демирован теклифдалди ва хуьруьн кьил Алияр Мегьамедан, школадин директор Диана Пирмегьамедовадин, райондин депутатар тир Расим Абдулгьалимован ва Адам Абдурашидован куьмекдалди тешкилнавай.
РикIел хкин, Османов Ибрагьим Османович 1983-йисуз Гилийрин хуьре дидедиз хьана. Мектеб акьалтIарайдалай кьулухъ Армиядин жергейра Россиядинни Китайдин сергьятдал къуллугъна. 2016- 2022-йисара Ибрагьима Тюмендин областдин нафтIадинни газдин мяденрал кIвалахна. Мобилизациядин сергьятра аваз дяведин махсус серенжемдиз эвер гайи Ибрагьима 2022-йисан 25-сентябрдилай Запорожьедин областдин мулкунал кьиле фейи женгера иштиракна. Ам гьуьлуьн пехотадин батальондин танкариз акси ракетайрин взводдин оператор тир. И.Османов 2022-йисан 30-декабрдиз, аскердин буржи кьилиз акъудзавай вахтунда, Дорожнянка поселокда кьиле фейи женгера телеф хьана. Россиядин Федерациядин Президентдин буйругъдалди, Ибрагьим Османович Османован игитвал «Жуьрэтлувиляй» ордендалди къейднава.
Жасмина Саидова
