Спортдин рекье вичихъ хъсан гележег авайди успатзавай жегьил пагьливанрикай сад Каспийск шегьердин 9-нумрадин юкьван школадин 8-классда кIелзавай Мугьаммад Айсаев я. Ам 2010-йисуз и шегьерда къалажухви Шафир Айсаеван хизанда дидедиз хьана.
Мугьаммад 7 йисан яшда авай чIавалай грэпплингдал, цIинин йисалай джиу-джитсудал машгъул я. И йисара ада жуьреба-жуьре акъажунра агалкьунралди иштиракна. Инал заз анжах цIи адахъ спортдин рекье хьанвай агалкьунар къейд ийиз кIанзава. Джиу-джитсудай кьиле фейи республикадин дережадин акъажунра 46 килограммдин заланвал авайбурун арада Мугьаммада 1-чка кьуна ва Дагъустанда авай джиу-джитсудин федерациядин президент Н.Эминова адаз грамота ва медаль гана. Алай йисуз клубдин къене 2 сеферда кьиле фейи акъажунрани ада вичин заланвилин дережадай гъалибвилер къачуна.
Чна умуд кутазвайвал, алакьунар авай пагьливанди дуьньядин дережадани вичикай хабар гуда.
Чи мухбир
