7-октябрдиз Мегьарамдхуьруьн райондин Советский хуьре­, лезги шииратдин «Колизейда»­, Гьасановрин кIвале литература­дин «Булах» кIватIалдин регь­бер Гуьзеля Гьасанова ри­кIел­ хкунин мярекат кьиле фена­. Лезги чилин гьар хуьрерай­ кIватI хьанвай яратмишзавай ин­­тел­ли­­­генциядин векилар­ сиф­те Гуь­зеля Гьасановадин сурал фена, анал цуькверин кIунчIар эцигна, адан руьгьдиз хийирдин ва сувабдин дуьаяр кIелна.

«Булах» кIватIалдин векилар­ тир Сейфудин Шагьпазова­ (Гелхен),  Гуьлжагьан ва Темирхан Мис­­ри­хановри (Дар­кIуш­-Къаз­ма­яр), Къа­димбег Иль­я­со­ва (Дружба, Къаякент рай­он), Марь­ям Алис­­керовади (Хъу­кь­вар, Хив­ район), Тамила Салмановади (Бут-Къазмаяр, Мегьарамдхуь­руьн рай­он), Агь­мед­паша Агь­мед­па­шаева («Куьредин ярар» макан), Владик Батманова­ (Махачкъала), Зарема Девришевади (Тагьирхуьр, Мегьарамдхуьруьн район), Сулейман Пашаева (Советский, Мегьарамдхуьруьн район) Муфрудин Алхасова (Махачкъала) ва и цIарарин авторди Гуьзеля Юзбеговнадин экуь къамат рикIел хкана, адан шииратдин дережадикай, тешки­латчивилин бажарагъдикай де­­рин къимет гунин ихтилатар авуна.  Рагьметлудан шиирар кIелна.

Мярекатдал икьрар хьайи­вал, литературадин «Булах» кIва­тIал идалай кьулухъ­ни­ давам хъжеда. Гуьзеля­ Юз­бе­­гов­нади  кьил  кутур  кар  ви­лик­­ди тухудай фикир вири­ юл­дашри хушвилелди кьабулна­.  И баркаллу рехъ давамарун­, адан руьгьдин вах, и кIва­тIал­дин эвел кьиле хьайи Гуьлжагьан Мисрихановадал тапшурмишна.

Мярекатдин эхирдай Гуьзелядин уьмуьрдин юлдаш Низамудин Гьасанова рагьметлудан шиирар кIелна ва атанвай юлдашриз сагърай лагьана.

Мизамудин Магьмудов