СтIал Сулейманан райондиз, кьилди къачуртIа Цмуррин инновациядин умуми образованидин школадиз халкьдин баркаллу адетар хуьн, абур акьалтзавай несилдал агакьарун, менфятлу цIийи крарик кьил кутун адет хьанвай кар я. Абурукай яз чавай Цмуррин инновациядин школадин бинедаллаз районда Россиядин аялрин ва жегьилрин «Сифтебурун гьерекат» («Движение первых») форум тухун къалуриз жеда.
Форумда и гьерекатдин региондин отделенидин жавабдар работникри, СтIал Сулейманан райондин кьил Саид Темирханова, образованидин управленидин начальник Гьуьсейн Шихбабаева, какахьай женгерай кьве сеферда дуьньядин чемпион хьайи Осман Гьажимусаева, волонтерри, СтIал Сулейманан ва Кьурагь районрай тир 250-дав агакьна школьникри иштиракна.
Асул программайрив эгечIдалди вилик Цмуррин школадин гуьрчегдаказ безетмишнавай гьаятда форум ачухунин мярекат кьиле фена. Адет хьанвайвал, государстводин гимн яна, Россиядин Федерациядин ва Дагъустан Республикадин пайдахар хкажна.
Райондин образованидин управленидин начальник Гьуьсейн Шихбабаева райондин кьил Саид Темирханован тIварунихъай форумдин иштиракчияр ва мугьманар тебрикна, «Сифтебурун гьерекатдин» сергьятра аваз районда тухузвай кIвалахдикай лагьана.
Вини СтIалрин ва Агъа СтIал-Къазмайрин юкьван школайра кIелзавайбуру манияр лагьана, кьуьлер авуна, Герейханован хуьруьн 2-нумрадин юкьван школада кIелзавайбуру (спортсменри) гиряяр хкажунай мастер-классар къалурна.
Форумдин сергьятра аваз спортдай, ватанпересвиляй, культурадай ва искусстводай, медиакоммуникацийрай, илимдай ва технологийрай, туризмдай, волонтервиляй, зегьметдай, экологиядай ва маса хилерай марифатдин майданар ачухнавай.
«Сифтебурун гьерекатдин» кIвенкIвечийри ачух веревирдера, конкурсра иштиракна, гьакIни медицинадин рекьяй сифте куьмек гунай, гамар хрунай, хъенчIин къапар гьазурунай, кIарасдал нехишар атIунай мастер-классар къалурна, ина мугьманри марифатдин рекьерай лекцияр кIелна.
Конкурсра активвилелди иштиракай аялри «Сифтебурун гьерекатдин» патай къиметлу пишкешар ва савкьатар къачуна.
Форумдин майдандал, Украинада кьиле физвай махсус серенжемдин иштиракчияр рикIел хуьнин лишан яз, «Эбеди кьулни» ачухнавай.
«Дустуниз ктаб» ва «РикIин хушвилин чарар» серенжемрин сергьятра аваз школадин фойеда СВО-дин зонадин аялриз ктабар кIватIунни тешкилнавай.
«Лап хъсан гуьруьшрин» сергьятра аваз форумдин иштиракчияр Саид Темирханова ва Осман Гьажимусаева тебрикна.
«Ихьтин кьетIен, зурба мярекатда иштиракун шадвал кутадай кар я. Инанмиш я, мярекатди аялрик рикIелай тефидай гьиссер кутуна. «Сифтебурун гьерекат» Россиядин Президент Владимир Путинан тапшуругъдалди тешкилнавайди я. Идан асул метлебни акьалтзавай несил гьар са рекьяй виликди фин я. Аялривай чеб образованида, илимда, спортда, яратмишунра, жуьреба-жуьре проектра ва конкурсра къалуриз, гележегдин пешедин патахъай тайинвал ачухариз жеда. Заз аялар чпин диде-бубадиз лайихлубур, Ватандиз вафалубур яз чIехи хьана кIанзава. Куьн «Сифтебурун гьерекатда» сад хьанва, гележег арадал гъун, уьмуьр бахтлуди авун патал. Куьн рикIе авай къени мурадрив агакьрай!» — къейдна Саид Темирханова.
Форумдин эхирдай адан иштиракчийри гуьрчегдиз сегьнеламишнавай шоу-программа къалурна.
Хазран Кьасумов
