8-октябрдиз Каспийскда, Росгвардиядин Дагъустан Республикада авай Управленидин пресс-къуллугъди хабар гузвайвал, тади гьалда серенжемар кьабулдай махсус отрядар (СОБР — специальный отряд быстрого реагирования) арадал атунихъ галаз алакъалу яз пешекарвилин югъ къейдна. Шад мярекатра Росгвардиядин Дагъустан Республикада авай Управленидин начальникдин заместитель Арсен Абдуллагьова, «Ястреб-Каспий» СОБР-дин командирдин везифаяр вахтуналди тамамарзавай полициядин подполковник Агьмед Агьмедова, отрядра къуллугъдин везифаяр кьилиз акъудзавай ксари иштиракна.
Мярекат ачухай Арсен Абдуллагьова Росгвардиядин Дагъустанда авай Управленидин начальник генерал-майор Александр Орехован тIварунихъай отряддин аскерриз пешекарвилин сувар тебрикна.
— Дагъустандин СОБР-дин къуллугъчияр датIана жуьрэтлувал, пешекарвал ва регьятди тушир чпин кIвалахдиз вафалувал къалуруналди тафаватлу жезва. Тади гьалда серенжемар кьабулдай отряд арадал гъайи сифте йикъарилай башламишна, адан къуллугъчийри международный терроризмдихъ галаз активнидаказ женг чIугуна, хайи республикада ва адалай къецени ислягьвал ва къайда хвена. Исятдани Ватандин абадвал патал куьне куь хиве авай везифаяр намуслудаказ кьилиз акъудун давамарзава. КьетIендаказ чухсагъул лугьунин келимаяр СОБР-дин ветеранризни лугьуз кIанзава. Чпин чешнедалди ва пешекарвилин тежрибадалди абуру жегьил къуллугъчияр тербияламишзава. Ватандиз вафалудаказ къуллугъ авунай куьн сагърай! Квехъ чандин мягькем сагъвал, рикIин шадвал ва хизанрани хушбахтвал хьурай! – алхишна ада.
А.Абдуллагьова ва гуьгъуьнлай мярекатдал рахайбуру чпихъ галаз санал зегьмет чIугур, кIвалахдин везифаяр кьилиз акъуддайла телеф хьайи юлдашар рикIел хкана. Абуруз хкажнавай мемориалдал цуьквер эцигна. Са декьикьада кисна акъвазуналди, абурун экуь къаматар рикIел хкана.
Рагнеда Рамалданова
